Guddiga Qiimaynta Daabkii Suuqa Idaacadda oo ka digay Akoonno ay Taakulaynta u furteen Dad aan la garanayn Cid igmatay
Hargeysa (Xogsoornews):- Guddiga qiimaynta khasaaraha ka dhashay Dab dhawaan gubay qayb ka mid ah Ganacsiyada Suuqa Idaacadda ee Hargeysa iyo Taakulaynta Dadka hantida ku waayey, ayaa ka digay Akoonno ay Taakulaynta u furteen Dad ay sheegeen inaan cid igmatay la garanayn.
Guddida heer Qaran ee Madaxweyne Jamhuuriyadda Somaliland Cabdiraxmaan Maxamed Cabdillaahi (Cirro), u magcaabay qiimaynta khasaaraha iyo Taakulada Hantida Dadka kaga gubatay Dabkii Suuqa Idaacadda, ayaa kulankoodii labaad maanta ku yeeshay Wasaaradda Dawladaha Hoose iyo Horuumarinta Magaalooyinka, waxaanay soo saareen go’aan ka kooban toddoba qodob oo kala duwan.
Go’aanadda Shirka ay Axadda maanta yeesheen Guddigu qodobbada go’aanka ay ka soo saareen, ayaa lagu faahfaahiyey Warsaxaafadeed qoraal ah oo ay soo saareen, waxaanay qodobbadaasi u dhignaayeen sidatan:-
“1. Guddidu waxay go’aamiyeen In la dhamaystiro wixii ka dhiman qiimaynta khasaarihii ka dhashay dabkii Suuqa Idaacadda.
2. Guddidu waxay gaadheen In la dhamaystiro akoonnada Baananka ee lagu shubayo taakulada khasaarihii dabka Suuqa Idaacadda.
3. Guddidu waxay go’aamisay soo ururinta xogta Ganacsatada Suuqa Idaacada guud ahaan.
4. Guddidu waxay gaadhay in la joojiyo akoonnada ay taakulaynta u fureen dadyaw gaar ah oo cid igmatay aanay jirin.
5. Guddidu waxay go’aamiyeen Samaynta Guddi isku dhafan oo ka kooban culimada iyo Ganacsatada.
6. Guddidu waxay gaadheen soo dhamaystirka qiimaynta dhismaha loo dhisi-doono Ganacsatada Suuqa Idaacadda ee khasaaraha dabku soo gaadhay.
7. Guddidu waxay gaadheen in guu ahaan bulshada lala wadaago hadba halka ay hawluhu.”
