Suuriya(Xogsoornews.com):-Diyaarad rakaab ah oo ku duuleysay hawada dalka Suuriya ayaa lagu khasbay inay khadka bedelato ka dib markii uu aad u sigay gantaal lidka diyaaradaha ah oo ay ku rideen ciidanka difaaca hawada ee dalkaas, sida ay shaacisay wasaaradda gaashaandhigga ee Ruushka.
Warbaahinta ruushka oo soo xiganeysay saraakiil dhinaca difaaca ah ayaa sheegtay in diyaaraddaas ay damacsaneyd inay ka caga dhigato magaalada Dimishiq, laakiin ay la kulantay jawaab ay ciidamada cirka ee Suuriya ka bixinayeen duqeymo la sheegay in diyaaradaha dagaalka ee Israa’iil ay aroornimadii Khamiista ka fulinayeen gudaha Suuriya.
Diyaaradda ku sigatay in uu gantaalka ku dhaco, oo uu nooceedu yahay Airbus 320, ayaa si deg deg ah ugu dagtay garoon ay ciidamada cirka ee Ruushka ku leeyihiin magaalada Hmeimim ee waqooyiga-galbeed Suuriya, sida ay wasaaradda shegetay.
In ka badan 172 ruux oo rakaab ah ayaa xilligaas saarnaa diyaaraddan.
Israa’iil wax war ah kama soo saarin duqeymaha dhacay Khamiistii, base waxay xustay inay boqollaal duqeymo ah ka fuliyeen gudaha Suuriya dhowrkii sano ee ugu dambeeyay, iyagoo ku bartilmaameedsanayay fadhiisimo ay leeyihiin maleyshiyaad taageero ka heysta Iiraan.
Waxay sidoo kale mas’uuliyiinta Israa’iil sheegeen inay wiiqayeen awoodda ay Suuriya kusii yeelanayaan xoogagga Xisbullah ee ay taageerto dowladda Iiraan.
Israa’iil ayaa wacad ku martay in aanay oggolaan doonin in Iiraan, oo cadowgeeda ugu weyn ah, ay awood qota dheer oo dhinaca milatariga ah kusii yeelato Suuriya, taasoo xukuumadda Tel Aviv ay u aragto isku day ay Iiraan iyo maleyshiyaadka taabacsan ku hareereynayaan Israa’iil.
Wali lama shaacinin dalalka ay u kala dhasheen dadkii saarnaa diyaaradda khatarta weyn gashay.
Warbaahinta Ruushka ayaa sheegtay in diyaaraddaas ay kasoo duushay magaalada Tehran ee caasimadda u ah dalka Iiraan. Warar hore usoo baxayna waxay sheegeen in diyaaradda asal ahaan laga leeyahay Ruushka.
Muxuu sheegay Ruushka?
Igor Konashenkov, oo ah afhayeenka rasmiga ah ee wasaaradda gaashaandhigga ee Ruushka, ayaa Israa’iil ku eedeeyay inay weerarradooda cirka ku beegaan xilliyada ay hawada ku jiraan diyaaradaha rakaabka ah, si ay ugu gabbadaan, ugana badbaadaan gantaallada ay isku difaacayaan ciidanka cirka ee Suuriya, marka ay howlgalladaas socdaan.
Arrintan, ayuu sheegay, “inay khatar galineyso boqollaal qof oo ah shacab aan waxba galabsan”.
Xukuumadda Moscow ayaa xulafo weyn la ah dowladda Suuriya ee uu madaxweynaha ka yahay Bashaar al-Asad.
Xogsoornews.com
Hargeisa
Xogsoornews.com
Xogsoormedia24@gmail.com
Hargeisa Somaliland