Hargeysa(Xogsoor Media.Net):- Shirkii golaha wasiiradda Somaliland ee Khamiislaha ahaa ee maanta oo uu guddoomiyahay Madaxweynaha Somaliland Muuse Biixi Cabdi,ayaa lagaga dooday isla markaana lagaga wada hadlay qodobo ay ka mid yihiin qaybinta deeqaha waxbarasho ee Somaliland hesho’nabad gelyada iyo arrimaha macdanta iyo Tamarta.
Waxaa kale oo lagaga wada hadlay heerarkii uu soo maray halgankii gobanimo doonka Somaliland ee soo taxnaa illaa xilligii gumaysigii Ingiriis.
Waxaana la isla qaatay in maalinta shuhadada SNM oo u astaysnayd 17-ka Oktoobar in loo aqoonsado maalinta geesiyaasha SNM.
War-saxaafadeed ka soo baxay qasriga madaxtooyada Somaliland oo lagaga hadlay qodobada shirka golaha wasiirada Somaliland lagaga dooday iyo nuxurka ka soo baxay ayaa u dhignaa sidan.
WAR-SAXAAFADEED
Kal-fadhigii 23-aad Ee Golaha wasiirradda Somaliland Waxa Maanta Lagaga Dooday Amniga, Waxbarashada Iyo Macdanta & Tamarta
Kal-fadhigii 23-aad ee golaha wasiirradda Jamhuuriyadda Somaliland, oo uu shir gudoominayey Madaxweynaha Jamhuuriyadda Somaliland, Mudane Muuse Biixi Cabdi, oo uu wehelinaayey madaxweyne ku xigeenka Somaliland, Mudane Cabdiraxmaan Cabdilaahi Ismaaciil (Saylici) ayaa maanta oo ay taariikhdu tahay 18/10/2018, waxa lagaga dooday arrimaha amniga, waxbarashada iyo macdanta & tamarta, iyadoo goluhuna warbiximo ka dhegeysteen, wasiirada, arrimaha gudaha, waxbarashada & sayniska iyo macdanta iyo tamarta
Waxaana ugu horayn halkaasi warbixin ka jeediyey Wasiirka Wasaarrada Arrimaha Gudaha Somaliland, mudane Maxamed Kaahin Axmed oo ka warbixyey Nabadayntii ay dhex dhigeen beelihii walaalaha ahaa ee ku dagaalamay koonfurta Gobolka Sool, iyadoo Goluhu uu ku bogaadiyey wefdigii Wasiirka arrimaha gudaha, Guddoomiyaha Golaha Wakiilada Somaliland, waxgaradkii iyo culumadii ka qayb qaatay deminta iyo soo afjaridda colaadaa, waxayna beelahaas ugu baaqeen inay go’aanada nabadaynta ay u hogaansamaan labada dhinac.
Sidoo kale goluhu waxa uu warbixin ka dhegeystay wasiirka wasaaradda macdanta iyo tamarta Somaliland, mudane Jaamac Maxamuud Cigaal, waxaanu wasiirku ku dheeraaday qiimaha macdanta ku duugan dalka iyo sidii looga faa’iidaysan lahaa, isagoo sheegay in la gaadhay wakhtigii ku haboonaa khayraadka dalka loola soo bixi lahaa, gaar ahaan macdanta.
Dhinaca kale Wasiirka wax-barashada iyo Sayniska ayaa golaha warbixin ka siiyey deeqdii waxbarasho ee ay wasaaraddu ka heshay dalka Itoobiya, waxaanu sheegay wasiirku inay ku qaybiyeen si caddaalad ah, ayna u eegeen sida Iskuulada dalka ay ardaydu uga soo kala baxday, isagoo xusay in gobolada qaar ay yarayd saamiga ay ka heleen deeqda maadaama ay yaraayeen ardayda ka soo baxday dugsiyada sare ee goboladaasi, balse ay u sameeyeen inay gobolada kale ay ka kaabaan oo ay u kordhiyaan tirada ardayda deeqda waxbarashada heshay. Waxaanay u dhignayd shaxdaasi sidan:-
Ugu danbayntiina Golaha Wasiirrada Jamhuuriyadda Somaliland iyagoo tixgalinaya mabaadiida aas-aasiga ah ee Dastuurka Jamhuuriyadda Somaliland iyo Sooyaalada halgamadii taariikhiga ahaa ee dalka soo maray, sida Halgankii Gobonimo-doonka Daraawiishta, kacdoonkii Culimida, aqoonyahanka, Suugaanleyda, halgankii gobonimo-doonka ahaa ee Axsaabta Siyaasadda, halgankii hubaysnaa ee SNM iyo halganka naftood hurayaasha ilaa maanta naftooda saymaha u galiya difaaca jiidaha hore ee dalka, waxay go’aamiyeen in maalinta Xuska Shuhadada SNM ee 17-ka Oktoobar magaceeda loo bedelo xuska Maalinta Geesiyaasha Qaranka Somaliland ee 17-ka Oktoobar.
ALLAA MAHAD LEH
Xafiiska Af-hayeenka Madaxweynaha JSL.
Xogsoormedia.net
Hargeisa Somaliland