Hargeysa(Xogsoor Media.Net):- Shirkii golaha wasiiradda Somaliland ee maanta,ayaa si weyn looga dooday shidaal wasakhaysan oo dhawaan dalka soo galay iyo sidii aanay mar dambe u dhici lahayn in shidaal wasakhaysani uu dalka soo galo.
Waxaa kale oo shirkaa laga soo saaray qodobo dhawr ah oo awood siinaya hay’adda dhawrista Tayada iyo Wasaaradda Ganacsiga oo yeelanaya baadhitaanka shidaalka dalka soo gelaya iyo hubintiisa.
War-saxaafadeedka Madaxtooyada kasoo baxay oo dhammaystiranina wuxuu u dhignaa sidan.
WAR-SAXAAFADEED
Nuxurka Qodobbo Muhiim ah oo Kasoo Baxay Shirkii golaha wasiirrada Somaliland ee Maanta
Kal-fadhigii tobnaad (10aad) ee ay yeeshaan golaha wasiirrada Jamhuuriyadda Somaliland, isla markaana uu shir-guddoominayey Madaxweynaha Jamhuuriyada Somaliland, Mudane Muuse Biixi Cabdi kuna wehelinaayey Madaxweyne ku-xigeenka Somaliland, Mudane Cabdiraxmaan Cabdilaahi Ismaaciil (Saylici), ayaa maanta oo ay taariikhdu tahay 26.04.2018, ka qabsoomay xarunta Madaxtooyada.
Shirkan, ayaa si faahfaahsan loogaga dooday arrimo ku saabsan dhibaatooyinka dhinacyada kala duwan ee nolosha ka haysta bulshada iyo caqabadaha soo kordhay, waxaana wax la iska weydiiyey sidii wada-jir loogaga bixi lahaa dhammaanba culaysyada kala duwan ee bulshada haysta.
Dood iyo falanqayn dheer kadib, kal-gadhiga golaha wasiirrada, waxa kasoo baxay qoddobo door ah oo ku saabsan sidii wax looga qaban lahaa shidaalka wasakhaysan ee dalka soo galay, kaas oo khasaare gaadhsiiyey gaadiid tiro badan, isla markaana ay xukuumaddu u yeelan lahayd shaybaadh casri ah oo lagu hubiyo tayada shidaalka waddanka soo gelaya, waxaana qodobadda soo baxay ay u dhignaayeen sidan:
- In tallaabo sharciga waafaqsan laga qaado shirkadihii keenay shidaalkii wasakhaysnaa ee dhibaatada soo gaadhsiiyey qaar kamid ah gaadiidka dalka.
- In Hay’adda Dhawrista tayada Somaliland ay la wareegto awoodda shaybaadhka hubinta shidaalka ee yaalla xarunta keydka shidaalka, si loo sugo tayada shidaalka dalka soo gelaya.
- In xukuumadda Jamhuuriyadda Somaliland keento lab (Shaybaadh) ay is u leedahay xukuumaddu laguna hubiyo tayada shidaalka waddanka soo gelaya, isla markaana kor loogu qaado awoodda hay’adda dhawrista tayada ee dalka.
- In wasaaradda ganacsiga, wershadaha iyo dalxiisku yeelato awoodda ugu dambaysa ee shidaalka dalka gudihiisa lagu isticmaalayo.
Ugu dambayntii madaxweynaha Jamhuuriyadda Somaliland, waxa uu xubnaha golaha wasiirrada uga mahadnaqay doorkii muuqday ee ay ku lahaayeen horumarkii ay xukuumaddu ku tallaabsatay muddadii 120-ka maalmood ahayd ee ay talada hayay.
Xogsoor Media.Net
abafgaab@hotmail.com
Hargeisa Somaliland