Hargeysa(Xogsoormedia.com):- ALLE ha u naxariistee waxa maanta Qubuuraha Naasa-hablood ee Magaalada Hargeysa aas qaran loogu sameeyay Guddoomiyihii Guddida Diwaan-gelinta Ururada siyasada iyo ansixinta Axsaabta qaranka Somaliland Marxuum Cabdirisaaq Jaamac Cumar (Cabdirisaaq Ciyaale) oo ku geeriyooday cusbitaalka guud ee Hargeysa, waxaana aaska Marxuumka ka qayb-galay Madaxweynaha la doortay ee Somaliland Muuse Biixi Cabdi, xubno ka tirsan golaha Wasiirrada, masuuliyiin ka socday saddexda xisbi qaran, Xildhibaano ka mid ah Baarlamaanka iyo dadweyne kale oo aad u danaynayay ka qayb-galka aaska Marxuumka.
Madaxweynaha ay doorteen shacbiga Somaliland Muuse Biixi Cabdi ayaa Marxuumka ku sifeeyay masuul taariikh ku lahaa dalka, waxaanu tacsi u diray qoyskii iyo eheladii uu ka geeriyooday.
Sidoo kale Madaxweynaha xilka ka sii dagaya Axmed Maxamed Siilaanyo ayaa Isagoo ku hadlaya magaciisa, ka dawladda iyo ka shacbiga Somaliland waxa uu tacsi u dirayaa, waxgaradka, waayeelka, aqoonyahanka, siyaasiyiinta, asxaabta qaranka, qoyskii, eheladii, qaraabadii, asxaabtii iyo shacbiga Somaliland ee uu ka baxay Alle ha u naxariistee Marxuum Cabdirisaaq Jaamac Cumar (Cabdirisaaq Ciyaalle) oo ahaa gudoomiyihii guddida diiwaan-gelinta ururada siyaasadda iyo ansixinta xisbiyada qaranka Somaliland oo ku geeriyooday saaka oo ay taariikhdu ahayd 30/11/2017, cusbitaalka guud ee Hargeysa.
Madaxweynuhu waxa uu marxuumka ku sifeeyey masuul hawlkar ah oo ka baxay qaranka, kana soo shaqeeyey nabadayntii iyo dib u dhiskii dalka laguna xasuusan doono doorkii uu ku lahaa kala saarida nidaamkii ururada faraha badan ee qaranku uga gudbay nidaamka saddexda xisbi qaran ee wakhtigan ka jira Somaliland.
Madaxweynuhu waxa uu marxuumka Alle uga baryayaa inuu naxariistiisa janno ka waraabiyo, waxgaradka, waayeelka, aqoonyahanka, siyaasiyiinta, asxaabta qaranka, qoyskii, eheladii, qaraabadii, asxaabtii iyo shacbiga Somaliland ee uu ka baxdayna Samir iyo iimaan saadiqa ka siiyo.
ALLE ha u naxariistee Marxuum Cabdirisaaq Jaamac Cumar (Cabdirisaaq Ciyaale) ayaa xilka Guddoomiyaha Guddida Diwaan-gelinta Ururada siyaasada iyo ansixinta Xisbiyada hayay muddo lix sannadood ah, waxaanu ka mid ahaa xubnihii u tartamay doorashadii Golaha Wakiillada Somaliland e sannadkii 2005-tii dalka ka dhacday, isagoo ka sharaxnaa xisbiga KULMIYE.
HALKAN KA DAAWO FAA-FAAHINAT WARKAN.
Xogsoor Media.Net