Hargeysa(Xogsoor Media.Net):-Madaxweynaha Somaliland, Axmed Silaanyo Oo maanta isugu yeedhay kalfadhi aan caadi ahayn golaha wasiirada Xukuumaddiisa, Maareeyeyaasha Hay’adaha Madaxa Banaan ee Dawlada iyo Taliyeyaasha Ciidamada,ayaa kulankan aan caadiga ahayn ee Madaxweynuhu uu la yeeshay laamaha kala duwan ee Xukuumaddiisa iyo Taliyeyaasha Ciidamda Somaliland oo ka qabsoomay qasriga madaxtooyada ayuu Madaxweyne Siilaanyo masuuliyiintan ku faray dardaaran iyo isla markaana ku sagootiyay duco iyo ammaan .
Madaxweyne Siilaanyo oo fadhiga aan caadiga ahayn ka akhriyay qoraal kooban,ayuu ku sheegay in ay guul u tahay ka madaxweyne ahaan iyo ka xisbi Kulmiye,ahaanba in mar labaad talada dalka loo doorto Xisbi xaakimka waxaanu intaa raaciyay in ay taasi ku timi dedaal badan oo ay ku shaqeeyeen madaxda laamaha kala duwan ee Xukuumaddiisa oo uu sheegay in ay ka dhabeeyeen ballanqaadkii ay umadda u soo bandhigeen xilli doorashadii hore ee Madaxtooyada ee Siilaanyo lagu doortay.
Waxaanu Madaxweynuhu ku bilaabay sidan. “ Ugu horreyn, waxaan si weyn idiinku bogaadinayaa dedaalka iyo doorkii qiimaha lahaa, ee aad ka qaadateen ololaha doorashooyinka Xisbiga Kulmiye.
Waxaan aamin-sanahay, in aad udub-dhexaad u tihiin guusha xisbiga kulmiye gaadhay. Waxaan aamin-sanahay, in xisbiga kulmiye lagu doortay horumarkii iyo wax-qabadkii uu dalka ka hirgeliyey, ee aad bud-dhiga u ahaydeen. Waxaan aamin-sanahay, in aynu xaqiijinnay himilooyinkii iyo hadafkii aynu lahayn, xukuumad ahaan iyo xisbi ahaanba.
Mudaneyaal iyo marwooyin,
Sharaf weyn ayey ii tahay, aniga ka madaxweyne ahaan, iyo idinkaba, in mar labaad xisbigeenii uu ku guulaysto hoggaaanka talada dalka. Sumcad iyo wanaagga aan maanta kaga tegay qarankan, idinkaa sabab u ah. Hoggaamiyayaashu way kala nasiib badan yihiin, ama wey kala cawo iyo ayaan badan yihiin.
Kumaan khasaarin, isla markaana eebbe iguma xilin, in aan idiin cugtay ama idiin magacaabay in aad noqotaan kaaliyayaashaydii..
Sidaa darted, waxaan jecelahay in aan dhammaantiin idiinka mahadceliyo, sidii hagar la’aanta ahayd ee aad u gudateen xilkii qaranka, isla markaana aad iila shaqayseen, iina garab is-taagteen.
Mudaneyaal iyo marwooyin
Sida aad la socotaan, waxaynu ku jirnaa xilli kala guur ah, oo aynu xilkii qaranka ku wareejinayno, madaxweynaha cusub ee la doortay, Mudane Muuse Biixi Cabdi. Haddaba, waxaan idin farayaa in mas’uul waliba deg-deg u diyaariyo, xil wareejintii looga baahnaa.
Waxa kale oo aan idinku adkaynayaa in wakhtiga kala guurka ah, la ilaaliyo hantida qaranka. Wakhtiga kala guurka. gun iyo gebo-gebo, waxaan idinkaga tagayaa niyad sami, mustaqbal wacan, madaxtinimo iyo duco”.
Xogsoor Media.Net
Hargeisa Somaliland