Hargeysa(Xogsoor Media.Net):-Doorashadii Madaxtooyada Somaliland dalka ka qabsoontay maalintii Inniintii ee ay taariikhdu ahayd 13,Nofember ee todobaadkii hore,ayaa waxaa ka qayb qaatay oo si weyn u codeeyay carruur aad u yar yar oo aan gaadhin xillii ay sharciyan codayn lahaayee
Waxa la soo bandhigay sawiro muujinaya carruur da’doodu aad u hoosayso kuwaasoo ka codaynaya qaar ka mid ah goobihii loogu tala galay codbixinta, iyada oo ay sharciga doorashooyinka iyo diiwaan gelinta ka mamnuuc ahayd in la diiwaan geliyo isla markaana ay codeeyaan caruurta aan qaangaadhka ahayn.
Dhinaca kale goob joogayaashii caalamiga ahaa ee ka qayb galay doorashadii madaxtooyada Somaliland oo warbaahinta la hadlay ayaa soo hadal qaaday carruur aan qaangaadh ahayn oo ka codeeyey qaar ka mid ah goobihii codbixinta, waxanay caddeeyeen in qaar ka mid ah goobaha codbixinta aan la raacin nidaamkii codaynta u dejisnaa.
Xisbiga mucaaridka ah ee Waddani ayaa haatan qaba cabasho balaadhan oo la xidhiidha in doorashada lagu shubtay, taasoo ay guddida doorashaduna sheegeen inay si dhakhso ah uga jawaabi doonaan cabashada xisbigaasi, balse waxay fari ku godan tahay qaabka ay guddida doorashadu u wadaan nidaamka tirinta codadka ay kala heleen xisbiyadu
Waxaa kaloo jira waraaqihii codaynta oo uu xisbiga waddani soo bandhigay kuwo aan sharci ahayn isla markaana uu ku dooday in meelaha qaar lagaga codeeyay taasoo uu gudiga doorashooyinkuna iska fogeeyay isla markaana uu ku tilmaamay dambi qaran oo ciddii lagu hlelo lagu qaadi doono.
Xogsoor Media.Net
Hargeisa Somaliland