Marsabit (Xogsoor Media.Net):- Laamaha ammaanka ee dalka Kenya gaar ahaan magaalada Marsabit ,ayaa qabtay oo gacanta ku dhigay afar nin oo u dhashay dalka Burundi oo ay sheegeen in ay u socdeen in ay ku biiraan Kooxda Al-Shabaab ee ka dagaalanta Soomaaliya.
Afarta qof ee u dhalatay dalka Burundi ayaa lagu qabtay Subaxnimadii hore ee maanta magaalada Marsabit oo ka tirsan Isiolo dalka Kenya, waxaana la sheegay in ragga la qabtay damacsanaayeen in ay ku biiraan Al-shabaab.
Saraakiisha booliiska ayaa sheegay in raggan ay ka yimaadeen magaalada Bujumbura ee dalka Burundi isla markaana Kenya ku soo galeen iyagoo sheegtay in ay dalxiiseyaal yihiin laakiin doonayay in ay marka danbe ka sii gudbaan xadka magaalada Mandera una tallaabaan dhinaca Soomaaliya.
Afarta ruux ee la qabtay ayaa magacyadooda lagu kala sheegay Ntakarutimana Benerd, 41 jir ah, Niyongere Yusuf oo 32 jir ah, Nshimirimana Fulgnce Shadady 31 sano jir ah iyo Bizoza Abderauf oo isaguna 20 sano jir ah.
Dalka Burundi,ayaa ka mid ah dalalka ay ciidamada nabad ilaalinta ee ka socda Midawga Afrika ay Soomaaliya ka joogaan kana mid yihiin ciidanka nabad ilaalinta ee AMISOM.
Waxaanay kooxda Al-Shabaab marar badan weerarro ku qaaday ciidanka dalka Burundi ee jooga Soomaaliya ee qaybta ka ah AMISOM
Xogsoor Media.Net