Hargeysa(Xogsoormedia.com):- Madaxweynaha Somaliland Axmed Maxamed Maxamuud Siilaanyo,ayaa Hotel Ambassador. Ee caasimadda Hargeysa waxaa uu ka furay qorshihii labaad ee horumarinta Somalland ee shanta sano ee soo socda oo uu sheegay in uu yahay qorshe balaadhan oo dalka waxar wayn u leh isla markaana ay taladisa wax ku leeyihiin dadka iyo deegaanada uu quseeyo.
Waxaa kale oo uu sheegay in qorshanai uu yahay mid la dagaalamaya saboolnimada,sahqo la,aanta waxsoosaar yaraanta iyo fakhriga.
Xilli ay lacagta shillinka Somaliland marayso halkii ugu hoosaysay ee ay abid gaadho lsla markaana uu qiimaha Boqolka Dollar gaadhay Halmilyan oo shillinka Somaliland ah oo kumaan ka dhiman yihiin.
Madaxweyne Siilaanyo waxaa uu qudbad uu ka jeediyay furitaankii shirka ku sheegay in qorshaha labaad ee shanta sano in uu wax ka qabanyo oo uu xal u noqonayo soo noq noqoshada abaaraha,waxsoosaar yaraanta iyo horumarinta khayraadka Badda iyo Xoolaha,isla markaana uu dalka ku soo dhiiri galinayo maalgashiyo caalami ah.
Laakin Marna Madaxweyne Siilaanyo xaalada adage e xilligan ay la deriska yihiin dadka danyarta ah iyo shaqaalaha dawladda ee Shillinka Somaliland mushaharka u qaata isla markaana ay lacagtoodii ku qiimo beeshay ee ay ku korodhay ugu yaraan boqolkiiba sodoon ku dhawaad xalkeedana laga sugayo Xukuumadda uu gadhwadeenka ka yahay kuma dhawaaqin yididiilo ay ky farxaan shillinka dalka shaqaalaha u xaadira iyo dadka danyarta ah eek u ganacsada lacagta dalka ee qaranku leeyahay isla markaana laga doonayo in ay dollar wax kasta oo ay noloshu u baahantahay in ay ku iibsadaan.
Qudbadda Madaxweynaha Somaliland Axmed Maxamed Siilaanyo uu furitaanki shirka ka jeediyay oo dhammaystiran ayuu ku bilaabay sidan,
“ Bismilaahi Raxmaani Raxiim,
Mudanayaal iyo Marwooyin,
Jamhuuriyadda Somaliland, waxay halkan kusoo gaadhay hayaan dheer iyo halgan qadhaadh, oo marxalado kala duwan soo maray. Tan iyo intii aynu xornimadeena la soo noqonay, waxaynu ku guulaysannay inaynu dhidibbada u taagno dhismaha qaran madax-bannaan, iyo nidaam dawladeed oo dhammaystiran.
Eebbe Mahadii, waxaynu ku guulaysannay nabad iyo xasilooni buuxda, taas oo ku timid midnimada, wada-jirka iyo iskaashiga Ummadda Jamhuuriyadda Somaliland. Waxa hubaal ah, in mudadaa rubuc qarniga ah, inaga oo aan aqoonsi haysan aynu ku talaabsannay horumar weyn oo la taaban karo, taas oo Somaliland ka dhigtay xaqiiqo jirta, oo nin neceb iyo mid jecel toonna aanu dafiri karin.
Dhinaca kale, waxaynu taabbo-gelinay nidaam siyaasadeed oo ku dhisan habka Xisbiyada badan, iyo doorashooyin xor ah, taasoo aan ka tis-qaadin qaaradda Afrika inteeda badan.
Mudanayaal iyo Marwooyin,
In kasta oo aynu xaqiijinnay guulaha aan soo sheegay, Somaliland waxay la wadaagtaa wadammada soo koraya caqabado tiro badan, sida dhinacyada dhaqaalaha, arrimaha bulshada, deegaanka, shaqo la’aanta, saboolnimada, iyo tayeynta maamulka dawladnimo. Waxa si weyn inoo saameeyey abaaro soo noq-noqonaya, oo ay sabab u tahay isbedelka cimillada dunidu, kuwaasoo innagu keenay hoos u dhac dhaqaale.
Mudanayaal iyo Marwooyin,
Si arrimahaas xal loogu raadiyo, Xukuumadda Xisbiga Kulmiye, ee aan gadh-wadeenka ka ahay, waxay diyaarisay markii ugu horreysay, qorshe dhammaystiran oo qarankani leeyahay, kaas oo la magac baxay Qorshaha Horumarinta Qaranka, ee 5-tii sanno ee la soo dhaafay (National Development Plan One). Qorshahaasi wuxuu ka turjumayey baahida Bulshada Somaliland, iyo mudnaanshaha mashaariicda deegaannada kala duwan ee Dalka. Dhinaca kale, waxaanu jaan-goynay hiigsiga iyo himillada qarankani leeyahay ilaa 2030-ka.
Mudanayaal iyo Marwooyin,
Waxa maanta farxad weyn inoo ah, in aynu daah furno qorshihii labaad ee horumarinta qaranka 2017 ilaa 2021. Qorshahani, waa mid dedaal badan la galiyey, oo ku salaysan xog, xaqsoor iyo xaqiiqo dhab ah. Qorshahani, waa mid ay taladiisa ka qayb-qaateen dadka iyo deegaanada, ay sida tooska ah iyo sida dadban u khusayso. Qorshaha Horumarinta qaranka ee labaad, wuxuu mudnaan siinayaa sidii loogu talaabsan lahaa horumar balaadhan
5-ta sanno ee soo socda, si gaar ah, wuxuu u abbaaraya
Ø Yaraynta Saboolnimada.
Ø Abuurista Fursado Shaqo.
Ø Dhiiri-gelinta Ganacsiga iyo Maalgashiga Caalamiga ah.
Ø Kor u qaadidda Wax-soo-saarka Dalka; Sida, Dalaga Beeraha, Kalluumaysiga, Beeyada iyo Casriyeynta Nidaamka Xoolo Dhaqashada.
Ø Ka hortagga Abaaraha iyo La-noolaanshaha Is-beddelka Cimillada Aduunka.
Ø Kordhinta Kaabayaasha Dhaqaale iyo Adeegyada Bulshada.
Ø Kor u qaadidda Maamul Wanaagga iyo Xuquuqda iyo Xoriyaadka Muwaadiniinta.
Waxaan aamin-sanahay, in uu qorshahani qaranka u hor-seedi doono, isbeddel laxaad leh iyo horumar balaadhan. Siyaasadda Qarankan, waxa udub dhexaad u ah tallo wadaag iyo isku tashi, hogaankiisuna waa qori isu-dhiib. Sidaa darteed, waxaan rajaynayaa in Madaxweynaha i beddeli doonnaa uu xaqiijin doonno Qorshaha Horumarinta Qaranka ee Labaad. Geba-gebadii, waxaan si weyn ugu mahad-naqayaa, Dawladdaha aynu saaxiibka dhaw nahay, ee Somaliland ka taageera Horumarka iyo Geedi-socodka Dimuqraadiyadda, waxaan leeyahay; “LIBAAX NIN GALLADAY, IYO NIN GANAY, LABADABA UU OG-YAHAY”.
Waxaan ku boorrinayaa, dhammaan Bulshada Reer Somaliland, iyo Qaadhaan Bixiyayaasha, innaga taageera dhinaca horumarka, in ay ka qayb qaataan hirgelinta qorshahan. Waxaan sidoo kale, farayaa dhammaan daneeyayaasha, in ay mashaariicda ay hirgelin doonaan ku saleeyaan Qorshaha Qaranka ee Labaad.
Ugu dambayn, waxaan u mahad-celinayaa Wasaaradda Qorshaynta Qaranka iyo Horumarinta, oo uu hormuud u yahay Wasiirka Wasaaraddu, Mudane, Maxamed Ibraahin Aadan (Qabyo-tire)”
Xogsoormedia.com
Xogsoormedia.com@gmail.com
Xogsoormedia24@gmail.com
abafgaab@hotmail.com
Hargeisa Somaliland