Muqdisho(Xogsoormedia.com):-Raysal-wasaaraha Xukuumada Federaalka Soomaaliya Xasan Cali Khayre ayaa si kulul u cambaareeyey weerarkii ismiidaaminta ahaa ee qasaaraha badan geystay ee ka dhacay  xarunta degmada Wadajir ee magaalada Muqdisho.

War saxaafadeed ka soo baxay xafiiska Raysal-wasaaraha ayaa  tacsi loogu diray dadkii ku dhintay weerarkan, waxaanu  Alle uga baryay  dadkii ku dhintay in uu u naxariisto oo Jannadii Fardowso ka waraabiyo, isagoo inta dhaawacantay u rajeeyay inay ka bogsadaan dhaawaca.

Raysal-wasaaraha ayaa sheegay in weerarkan lagu soo beegay xilli ay dadka Soomaaliyeed ku jireen diyaar garowga ciidda iyo maalmihii u dambeeyey ee Bisha barakeysan ee Ramadaan, sidaa awgeedna ay tallaabadani ka turjumeyso ujeedooyinka gurracan ee kooxda Al-shabaab  iyo in ay bannaysteen daadinta dhiigga umadda Soomaaliyeed.

”Kooxda Al-Shabaab way u soo jeesteen in ay shacabka isku qarxiyaan ee ma wadaan dan Soomaaliyeed, mana heystaan diin, waana in aan meel uga soo wadajeesano oo juhdi walba aan ku bixinaa. Waxey rabaan inay taariikhda ummada baabiiyaan, waxey bartilmaameedsadaan maatada iyo carruurta, mana galaan wallaal”ayaa lagu  yidhi War-saxaafadeedka ka soo baxay xafiiska Raysal-wasaaraha Soomaaliya asan Cali Khayre.

Waxaa kale oo uu ugu baaqay dhallinyarada ka tirsan kooxda Al-Shabaab in ay ka faa’iidaystaan cafiskii Madaxweynaha Soomaaliya oo ay isu soo dhiibaab dawladda Soomaaliya isla markaana ka noqdaan waxa ay ku jiraan oo uu sheegay in ay tahay halaag iyo dambi diin ahaan iyo umad ahaanba aan bannaanayn in la xalaashado daadinta dhiigga ummadda islaamka isagoo intaa raaciyay cidda ay ku qarxayaan ee ay gumaadayaan in ay tahay walalahood iyo waaildkood.

Waxaa kale oo uu ugu baaqay umadda Soomaaliyeed in ay u midoobaan in  lala dagaalamo kooxda Al-Shabaab oo dalka iyo dadka laga xoreeyo

Xogsoormedia.com

abafgaab@hotmail.com

Hargeisa Somaliland