Hargeysa(Xogsoormedia.com):-Hantidhawrka guud ee qaranka Somaliland Maxamuud Aw Cabdi Ibraahin,ayaa sheegay in ay bilaabeen isla markaana ay dar dar galinayaan baadhitaannada iyo ilaalinta hantida qaranka Somaliland isla markaana ay la xisaabtamayaan guud ahaan masuuliyiinta dawladda ka dib markii uu Madaxweynaha Somaliland Axmed Maxamed Maxamuud Siilaanyo uu dhawaan amar ku bixiyay in hantidhawrku shaqadiisa si madaxbannaan u guto oo la isla Xisaabtamo.
Waxaanu ka bilaabay wasaarado ka mid ah wasaaradaha Dawladda Somaliland baadhitaanno ay ku sameeyeen labadii maalmod ee u dambeeyay.
Waxaanu intaa ku daray Maxamuud Dheere in hawlahoodii shaqo ay sii laban laabayaan oo ay sii kordhinayaan isla markaana ay sii xoojinayaan baadhitaanada laamaha Dawladda, hantidhawraha oo u waramay telefishanka Bulsho, ayaa sheegay oo yidhi “Madaxweynuhu wuxuu amar ku bixiyay in la bilaabo oo la wanaajiyo maamulka xisaabaadka dawlada oo laga warbixiyo lagana natiijo keeno xisaabaadka dawladda, haddaba annagoo fulinayna amarkaas guud ee madaxweynuhu soo saaray waxa noo bilaabantay inaanu bilowno baadhiso ka xoog iyo xawaare badan doona baadhishii hore u samayn jirnay taas oo ku waajahan dhamaaan maamulada kala duwan ee dawladda.”
Wuxuu hantidhawrku intaa raaciyay “Sidaas darteed annagoo ka tusaale qaadanayna waanada uu madaxweynuhu soo jeediyay oo dardaarankiisi ku socona kana jawaabayna amarkiisa, waxaanu galnay inaanu baadhistii xoojino.”
Inkastoo Hay’adda Hantidhawrka guud ee Qaranka lagu dhaliilo in ay tahay fadhiid oo aanay gudanin shaqada ay qaranka uga masuulka tahay isla markaana lagu dhaliilo in hadba halka farta loogu fiiqo oo kaliya in ay baadhitaanno ka bilaabi jirtya,ayay hadana qaybaha kala duwan ee bulshadu si wayn u soo dhaweeyeen tallaabooyinka uu qaaday labadii maalmood e u dambeeyay oo ay u arkeen in Hanti dhawrkii soo noqday oo uu shaqadiisii dib u bilaabay.
Laakiin waxaa laga war sugayaa bal sida ay u wadaaan hantidhawrku shaqada ay bilaabeen iyo dabagalka iyo ilaalinta hantida qaranka in ay si sax ah uga hawl galaan iyo in ay ku ekaato laba cisho iyo muddo kooban.
Xogsoormedia.com
abafgaab@hotmail.com
Hargeisa Somaliland