“Dhacdadii Kalabaydh gacantaa lagu hayaa xaaladuna way deggan tahay sarkaalkii falkaa lagu tuhmayayna wuu xidhan yahay.. sarkaalkii Taliyaha dhaacaway waa lagu daba jira.”
“Dawladdu Kamay Mashquulin abaarta dadkeedana waxba kalama hadhayso. Sicir bararkii wuu soo noqday laakiin tallaabooyin ayay xukuumaddu ka qaadayanaysa hawshaana waa la wada.” Wasiirka Arrimaha Gudaha Somaliland waraysi gaar ah
Hargeysa(Xogsoormedia.com):- Wasiirka Wasaaradda Arrimaha Gudaha Somaliland Prof: Yaasiin Maxamuud Xiir(Faratoon),ayaa ka hadlay xaaladda abaarta ku habsatay Somaliland iyo siday u saamaysay nolosha dad iyo duunyo ee dalka gaar ahaan gobolada bariga Somaliland,sicir bararka iyo tallaabooyinka ay Xukuumaddu ka qaadayso oo uu sheegay in ay ka goantahay in ay fulaan go,aamaddii Xukuumaddu oo aan laga noqonayn.
Waxaa kale o uu ka hadlay Wasiirku shaqaaqo dhawr qof ku dhinteen oo ka dhacday deegaanka Kala Baydh ee gobolka Sool oo u sheegay in ay imika deggan taha isla markaana xaaladdu ay nabad tahay dawladduna ay gacanta ku hayso lana xidhay sarkaal ciidanka qaranka ka tirsan oo shaqaaladaa loo aanaynayo in uu ku lug lahaa. Waxaa kale oo uu intaa kudaray in ciidanka boolisku ay ku dabo jiraan sarkaal ka tirsan ciidanka waaxda Socdaalka iyo shaqsiyaad la socday oo Hargeysa toogasho ku dhaawacay Taliyaha Saldhigga Booliska degmada Maxamuud Haybe iyo askari booliis ah.
Waxaanu wasiir Prof: Yaasiin Maxamuud Xiir Faratoon sidaa ku sheegay waraysi gaar ah oo uu khadka Taleefanka ku siiyay wargeyska Dawan isagoo ku gudo jira socdaal shaqo oo uu ku marayo gobolada Bari ee Somaliland.
Ugu horrayn Wasiirka oo ka jawaabayay su’aal laga waydiiyay shaqaaqadii dhawaan ka dhacday deegaanka Kalabaydh ee gobolka Sool iyo tallaabooyinka ay Xukuuaddu qaadday,ayaa yidhi. “Horta shaqaaqadaasi way dhacday dadna wuu ku dhintay waanan ka xunnahay ka dawlad ahaan in guud ahaan Somaliland in ay shaqaaqo iyo xabad gudaha dalkeena laga riday cid innaga disho laakiin qadarka iyo geerida ayaanay cidina baajin karayn laakiin markii ay shaqaaqadu dhacday dawladdu deg deg ayay uga hawl gashay xaaladina nabad gelyo ayay ku soo celisay sarkaalkii loo tuhmayay in uu shaqaaqada ku luglahaana wuu xidhan yahay xaaladuna waa nabad wax dhib ah oo imika halkaa ka taaganina ma jirto baadhitaanona way noo socdaan iyo sidii ay wax u dheceen iyi ciddii sababta lahayd.”
Wasiirka oo ka jawaabayay su’aal laga waydiyay toogasho habeen sadexaad Hargeysa ka dhacday iyo in gacanta lagu soo dhigay eedaysaneyaashii sarkaalka iyo askariga toogtay,ayaa yidhi. “ Toogashadaasi markii ay dhacdayba ciidanku wuu ka hawl galay walina hawlgalkii way ku jiraan ciidanku taliyaha iyo askariga la dhaawacayna way ladan yihiin sarkaalka toogashda geystayna ciidanku way ku dabo jiraan waanu socdaa hawlgalka lagu soo qabanayaa waxaanan rejaynaa intaan la soo qaban in sarkaalka toogashada geystay in uu ciidanka isu soo dhiibi doono.”
Wasiirka oo ka jawaabayay su’aal laga waydiiyay in Xukuumaddu ay ka gaabisay gurmadka xaaladda abaarta iyo saamaynta ay ku yeelatay dadka,ayaa ku jawaabay. “ Horta abaartu dalka way ka jirtaa waanay ku sii balaadhatay oo meel adag ayay maraysaa dawladduna kamay gaabin ee gurmadkii ugu waynaa ayay ku jirtaa shaqo maalmeedka dawladda waxaa ugu way nee lagu saleeyayna waa abaarta sababtoo ah cidda ay abaartu saamaysayna waa dadkayagii kama mashquulayno laakiin xaaladda taagani waa mid ALLE oo kali ahi uu wax ka qaban karo abaartu maaha xaalad dadku dabooli karo saamaynteeda ALLE,ayaan ka baryaynaa in uu inaga soo jabiyo oo Raxmaadkisa inoogu deeqo maantana dadku halis ayay ku sugan yihiin oo xataa dhimasho ayaa jirta markaa waxaan leeyahay dadkeena wax haystana waa maalintii dhaqashada maalku uu janno goynayay ee dadkiina soo caawiya oo waxaad tari kartaan tara.”
Ugu dambayn wasiir Prof: Yaasiin Maxamuud Xiir Faratoon oo ka jawaabayay su’aal laga waydiiyay soo noqoshada Sicir bararka iyo sababta ay u fuli waayeen go’aamadii Xukuumaddu hore uga soo saartay,ayaa yidhi. “waa run oo sicir bararkiui wuu soo noqday oo halkiisii ayuu ku noqday waana dhibaato kale oo soo noqotay dawladduna kamay hadhin fulinta go’aamadii ka soo baxay ee lagula dagaalamayay sicir bararka laakiin waxaa jira waxyaabo badan oo sidii la moodayay noqon waayay oo daraasado dambe lagu ogaaday oo ay ka mid yihiin in aan si deg deg ah oo dhakhso ah looga saari karin E-Dahab iyo Zaad wixii ka yar 100$ Dollar laakiin go’aamadii ay Xukuumaddu ka soo saartay maaha qaar laga hadhayo gudigii hawshaa u xilsaarnaana way wadaan hawshoodii si deg deg ahna waxbaa looga qabanayana cid kasta oo ku lug leh sicir bararka iyo kor u kaca qiimaha Dollarkana tallaabo ayay dawladdu ka qaadi doonta.”
Xogsoormedia.com
Hargeisa Somaliland