Hargeysa(Xogsoormedia.com)- Taliyaha ciidanka Booliska Jamhuuriyadda Somaliland, Sarreeye guuto Cabdilaahi Fadal Iimaan, ayaa sheegay in ciidanka Boolisku ay gacanta ku soo dhigeen Aabbo iyo laba wiil oo uu dhalay oo ku eedaysan toogasho lagu dhaawacay Taliyihii saldhigga Booliska ee Degmada Maxamuud Haybe iyo a hal askari habeen hore .
Taliye Fadal oo shir jaraa’id ku qabtay xarunta taliska birmadka afartii habeenimo ee xalay , waxa uu ku sheegay in ciidanka Boolisku ay gacanta ku dhiigeen Gaashaanle Yuusuf Cismaan Cali (Daanyeero) oo ka tirsan ciidanka laanta Socdaalka oo habeenimadii 6-dii Bishan dhaawacay Taliyihii Saldhiga degmadda Maxamuud Haybe ee caasimada Hareysa, Kabtan Cabdi Kayd Halac iyo askari ka tirsan saldhigaas.
Taliyuhu waxa uu xusay in eedaysane Yuusuf Daanyeero iyo laba wiil oo uu dhalay oo kula jiray falkaasi xalay saddexdii habeenimo ciidanka boolisku hawlgal ballaadhan oo ay sameeyeen kaga soo qabteen guri ku yaalla magaalada Wajaalle ee gobolka Gabiley. Labadiisa wiil ee lala soo qabtay waxa uu magacyadooda ku sheegay Taliyuhu in la yidhaahdo Cabdirashiid Yuusuf Cismaan iyo Cabdifataax Yuusuf Cismaan.
Sareeye Guuto Cabdilaahi Fadal Iimaan, waxa uu si weyn ugu mahadceliyay ciidanka Booliska oo uu ku sifeeyay naftood hureyaal nabadgelyada dalkooda xasladay, waxaanu ammaanay dhammaan ciidankii booliska ee hawlgalkaas fuliyay laga bilaabo Taliye Ku-xigeenkiisa koowaad illaa askariga dablaha ah ee ka qaybgalay hawl-galka.
Taliyaha ciidanka Boolisku waxa uu sheegay in eedaysane Yuusuf Daanyeero la soo qabtay isagoo lug ka qaba dhaawac fudud , waxaanu xusay in sida ugu dhakhsaha badan loo horgeyn doono sharciga.
Taliye Cabdilaahi Fadal, waxa uu intaas ku daray in tallaabo adag laga qaadi doono cid kasta oo ciidanka booliska dagaal iyo rasaas kala hortimaada.
Taliyaha Boolisku waxa uu sheegay in dhibaatada ugu badan ee dalka ka taagani ay tahay murranada dhulka.
Taliye Fadal waxa uu mar labaad u mahadceliyay ciidankii hawlgalkaasi fuliyay oo uu ku sheegay naftood hureyaal qaran.
Shirka jaraa’id ee Taliyaha ciidanka booliska, waxa goobjoog ka ahaa Taliye ku-xigeenka koowaad sareeye Guuto Cabdiraxmaan Liibaan Axmed (Fooxle), Hoggaannada, Taliyeyaasha qeybaha kala duwan ee ciidanka Booliska.
Xigasho Gudgudenews
Xogsoormedia.com