“Diiwaan Galinta Codbixiyeyaashu waxay midaysay Somaliland oo ay ka wada qabsoontay wada jirkaasina qaddiyadda qaranka ayuu iib geynayaa.”
“Ceel-afweyn wax dhibaato ahi hadda kama jirto shaqaaqadii u dambaysaysa dad iyo gaadiidba waa loo xidhay.” Wasiirka Arrimaha Gudaha Waraysi gaar ah.
Hargeysa(Xogsoormedia.com):- Wasiirka Wasaaradda Arrimaha Gudaha Somaliland Prof: Yaasiin Maxamuud Xiir (Faratoon), ayaa sheegay in diiwaan galinta codbixiyeyaasha doorashooyinka Somaliland ee la soo gunaanaday in ay tahay guul qaranka Somaliland gaadhay iyo hawl midaysay guud ahaan bulshada reer Somaliland oo dalka oo dhan ka wada qabsoontay.
Waxaanu intaa raaciyay diiwaan galinta codbixiyeyaasha ee soo xidhantay in ay meesha ka saartay wixii lagu murmi jiray ee la odhan jiray Somaliland qaybo ayaa maqan iyo looma dhama taasoo uu tilmaamay in ay wax wayn ka tarayso qaddiyada Somaliland ee aqoonsi raadinta.
Waxaa kale oo uu Wasiir Faratoon ka hadlay xaalada nabad gelyo ee deegaanka degmada Ceel-afweyn shaqaaqadii dhawaan ka dhacday ka dib oo uu sheegay in ay dawladdu arrinta gacanta ku hayso isla markaana ay ku maqan yihiin kuna sugan yihiin deegaankaas Wasiirro Xukuumadda ka tirsan iyo madaxdhaqameed reer Somaliland ah.
Waxaanu sidaa ku sheegay waraysi kooban oo uu xalay khadka taleefanka ku siiyay wargeyska Dawan.
Wasiirka oo ugu horrayn ka hadlaya diiwaan galinta Codbixiyeyaasha doorashooyinka Somaliland siday dalka uga wada qabsoontay,ayaa yidhi. “Diiwaan galinta codbixiyeyaasha doorashooyinka Somaliland ee la soo geba gabeeyay waxay ahayd hawl qaran oo guul ku soo dhamaatay iyo tallaabo wanaagsan oo Somaliland u qabsoontay oo qaranka wax wayn ugu fadhida. Waxaanay meesha ka saartay hadalo meelahaa laga odhan jiray oo ah Somaliland looma dhama iyo cidbaa ka maqan. Tallaabadaasina waa mdi lagu guulaystay oo dalka oo dhan ka wada qabsoontay xataa deegaanadii aanay hore uga qabsoomi jirin ee Sool iyo Sanaag bari ayay ka qabsoontay mana jirto maanta meel Somaliland ka mid ah oo aanay ka qabsoomin amma aanay ka hir galin diiwaan galinta codbixiyeyaasha Somaliland.”
Waxaanu Wasiirka oo hadalkiisa sii wataa intaa raaciyay. “marar badan ayaa lagu cel celiyay Somaliland looma dhama oo xataa beesha caalamku odhan jirtay,laakiin taasi hadda ma jirto Somaliland oo isku duuban oo wada jirta ayay inta gaadhay da’da codbixintu is diiwaan galisay taasina waxay markhaati ka tahay in umadda reer Somaliland ay leeyihiin taladooda iyo masiirkooda isla markaana ay dooran karaan cidda ay doonayaan waxaanay wax wayn ka taraysaa qaddiyada aqoonsi raadinta Somaliland.
Somaliland-na mar walba waxay qabsanaysaa wixii danteeda ah eek u waajib ah Beesha caalamkana waxaa looga baahan yahay in aanay dafirin xaqiiqada Somaliland ka jirta iyo in ay tahay qaran madaxbannaan oo masiirkiisu ku jiro gacanta ummadiisa oo aan meel kale looga talin. Caalamkuna wuu ogyahay waanu arkaa in Somaliland iyo Soomaaliya ay laba qaran oo kala madaxbannaan in ay yihiin haddii aanay xaqiiqada is diidsiinayn.markaa Diiwaan galinta codbixiyeyaasha ee Somaliland u soo dhamaatay waxay marag cad ka tahay in Somaliland ay tahay nabad gelyo oo meel kasta oo Somaliland ah la tegi karo hawl qaranna laga qaban karo iyo in Somaliland ay midaysan tahay oo aanay maanta kala maqnayn waana xaqiiqo u baahan in caalamku garawsado.
Waxaanan u mahan naqayaa guud ahaan bulshada reer Somaliland. Ciidamada qaranka iyo booliska oo nabadgelyada sugayay,gudiga doorashooyinka,asxaabat qaranka iyo Xukuumadda Somaliland oo suura galisay in diiwaan galinta codbixiyeyaashu dalka oo dhan ka wada qabsoonto isla markaana nabad gelyo ku soo dhamaato oo ay ku soo xeroodaan sanaaduuqdu.”
Wasiirka oo wax laga waydiiyay shaqaaqadii Ceel-afweyn iyo xaaladda nabad gelyo ee deegaankaas,ayaa ku jawaabay. “Deegaankaasi hadda waa nabad gelyo oo wax dhibaato ahi kama taagna waxaana ku sugan oo jooga
Wasiirro Xukuumadda ka tirsan,Salaadiin iyo wax garad kale oo dhidibadda u adkayanaya nabadda,intii g’aamada Xukuumaddu ay soo baxeena mar ayay shaqaaqo ka dhacday deegaan ka tirsan degmada Ceel-afwayn kana durugsan halkii markii hore wax ka dheceen, shaqaaqadaa dambena Xukuumaddu way ka hawl gashay oo waxaa jira dad iyo gaadiid dhibaatadaa lo soo qabtay cid kasta oo ku lug yeelatana waa la qabanayaa go’aamadii Xukuumadduna sidooda ayay u fulayaan ciidanka qarankuna way joogaan markaa halkaa imika wax dhibaato ahi kama taagna.”ayuu yidhi Wasiirka Wasaaradda Arrimaha Gudaha Somaliland Prof: Yaasiin Maxamuud Xiir (Fataroon)
Xigasho:Wargeyska Dawan.
Xogsoormedia.com
Xogsoormedia24@gmail.com
Xogsoormedia.com@gmail.com
abafgaab@hotmail.com
Hargeisa Somaliland