Laascaanood (Xogsoormedia.com):- Guddoomiye ku xigeenka komishanka doorashooyinka qaranka Somaliland ayaa shalay tababar ugu soo xidhay magaaladda Laascaanood, 305 ka mid ah shaqaalaha ka hawl-geli doona diiwaangelinta codbixiyeyaasha ee la filayo in ay dhawaan ka bilaabanto gobolka Sool.
Waxaana magaaladda Laascaanood hawlo shaqo ku jooga xubno ka tirsan komishanka doorashooyinka Somaliland oo uu kor kacayo guddoomiye ku xigeenka gudiga doorashooyinka, Maxamuud Xasan Wacays, Kuwaasi oo hawlo qiimayn oo ay ku samaynayaan qaabka ay diiwaangelintu uga qabsoomayso ka wada gobolkaasi.
Ardaydan tababarkan loo soo xidhay oo ah ardayda jaamacadaha Nugaal iyo jaamacadda Bariga Afrika ee Buuhoodle, iyadoo uu tababarkaasina u socday muddo 8 maalmood ah. Kuwaasi oo loo sii diyaarinayo in ay qayb ka noqdaan shaqaalaha diiwaangelinta codbixiyeyaasha.
Guddoomiyaha gudiga doorashooyinka ee gobolka Sool C/laahi Laba-go’le, oo faahfaahin ka bixiyay ardaydan tababarka loo soo xidhay ayaa sheegay in 305-tan arday ay ka mid ahaayeen 800, oo arday oo laga kala keenay jaamacadaha gobolka Sool, kuwaasi imtixaan laga qaaday kadib ay soo baxeen 305-tan tababar qaatay.
Waxaanu yidhi “Waxaanu maanta (shalay) tababar u soo xidhnay shaqaalihii ka shaqayn lahaa goobaha diiwaangelinta codbixiyeyaasha ee gobolka Sool, kuwaasi oo ay tiradoodu dhan tahay 305 qof. Shaqaalahani oo ah kuwii laga qaatay jaamacadaha gobolka Sool, waxaana lagu soo xulay aqoon, oo imtixaan ayaa laga qaaday, waxaana imtixaankaasi galay ilaa 800 qof oo reer Sool ahaa.Tiradda shaqadan loo doonayay-na waxay ahayd 305 qof”.
C/laahi Laba-go’le, guddoomiyaha gudiga doorashooyinka ee gobolka Sool waxa kale oo uu ka hadlay wakhtiga ay diiwaangelinta codbixiyeyaashu ka bilaabanayso gobolka Sool. “Sida uu markii hore qorshuhu ahaa, waxay ahayd in diiwaangelinta codbixiyeyaashu ay 13-ka bishan August ka bilaabanto gobolka Sool, hase yeeshee cabashooyin ka yimid odayaasha iyo waxgaradka gobolka iyo dadka siyaasiyiinta ah ee ka soo jeedda gobolkan darteed ayaa dib loogu dhigay.
Axadii dhawayd komishanku shir ayay ka yeesheen, shirkaasina waxaa ka qayb galay xubno siyaasiyiin ah oo ka soo jeedda gobolkan, arrimihii ay komishanka kala hadleena am aka cod-sadeen waxaa ka mid ahayd goobaha in loo kordhiyo, mudadda ay diiwaangelintu soconayso in la kordhiyo, wacyigelin dheeraad ah la sameeyo, arrimahaasina waa la is-la af-gartay”.
Waxaanu intaasi ku daray “Gobolkan Sool, waa gobolkii ugu danbeeyay ee ay ka qabsoonto hawsha diiwaangelinta codbixiyeyaashu, waanu ka duwan yahay goboladii hore, haka duwanaadee, hadana xeerarkii goboladii kale lagu maamuli jiray-na ama lagu dhiqi jiray ayuun-baana lagu maamulayaa.
Hase yeeshee waxaad moodaa, in dadku ay hadda si ka duwan doorashooyinkii hore iyo diiwaangelintii hore ee gobolka ka dhici jiray, in ay ugu diyaar yihiin”ayuu yidhi guddoomiyaha komishanka ee gobolka Sool.
Si kastaba ha ahaatee, diiwaangelinta codbixiyeyaasha ayaa hore loo qorsheeyay in ay 13-ka bishan ka bilaabanto gobolkaasi, hase yeeshee cabashooyinka soo yeedhay odayaasha, waxgaradka iyo siyaasiyiinta gobolkaasi, kadib ayaa la si-la qaatay in ay ka bilaabanto dabayaaqadda bishan.
Gobolka Sool ayaa noqonaya gobolkii ugu danbeeyay ee ay ka dhacdo diiwaangelinta codbixiyeyaasha Somaliland, taasi oo hore uga soo dhacday goboladda kale ee dalka
Xogsoormedia.com
Hargeisa Somaliland