“Puntland Waa In Ay Xaqdhawrtaa Dariswanaagga Iyo Soohdimaha Sharci Ee Noo Dhexeeya’Bulshada Gobolka Sanaagna Waxaan Leeyahay Waa Xuquuq Aad Leedihiin Ee Is Diiwaan Galiya.”
“Xaaladaha jira markii la isla eegay waxaa la gartay in Laasqoray aanay ka dhicin kolayna waa xil Xukuumaddu lahayd in ay ka qabsoonto.
“Haddaan talada dalka ku guulaysano waxaa na saran waajibaadka laga sugayay Xukuumaddihii naga horreeyay waxaana noo qorshaysan in dalka oo dhan aanu maamulka wada gaadhsiino.” Guddoomiyaha Golaha Wakiiladda Waraysi gaar ah.
Ceerigaabo(Xogsoormedia.com):- Guddoomiyaha Golaha Wakiiladda ahna Guddoomiyaha Xisbiga Mucaaridka ah ee WADDANI Cabdiraxmaan Maxamed Cabdilaahi Cirro,ayaa farriin u diray Maamul goboleedka Puntland ee Soomaaliya isla markaana ku adkeeyay in ay dhawrto daris wanaagga iyo jaarnimada iyo soohdin wadaagta ay Somaliland deriska kula tahay kana fogaato isku day kasta oo ay ugu soo xadgudubto dhulka Somaliland.
Waxaa kale oo uu ka hadlay qaabka ay uga bilaabantay diiwaan galinta Codbixiyeyaasha doorashooyinka soo socda guud ahaan gobolka Sanaag gaar ahaan caasimaadda gobolka ee Ceerigaabo.
Guddoomiyaha Golaha Wakiiladda ahna Guddoomiyaha Xisbiga Mucaaridka ah ee WADDANI Cabdiraxmaan Maxamed Cabdilaahi Cirro waxaa uu sidaa ku sheegay waraysi gaar ah oo uu khadka Tilifoonka ku siiyay shabakada Wararka ee Xogsoormedia.com galabta isagoo ku sugan xarunta gobolka Sanaag ee Ceerigaabo.
Ugu horrayn Guddoomiye Cabdiraxmaan Maxamed Cabdilaahi Cirro, oo aanu waydiinay sida ay guud ahaan gobolka Sanaag uga bilaabantay saaka diiwaan galinta Cobixiyeyaasha Doorashooyinku ayaa ku jawaabay. “ Guud ahaan gobolka Sanaag si wanaagsan ayay uga bilaabantay diiwaan galinta Codbixiyeyaashu marka laga reebo meelo ay ka habsaantay oo laga cabanayay dhanka gaadiidka oo ku filnaan waayay isla markaana ay dib uga dhacday oo ay goor dambe gaadhay mooyaan e wax kale oo dhibaato ahi kama taagna diiwaan galinta codbixiyeyaasha gobolka Sanaag.
Waxay si wanaagsan oo aan hakad lahayn uga socotaa isla markaana ay dadku iskaga diiwaan galinayaan dhamaan goobaha gudaha degmada Ceerigaabo oo aan dhamaantood soo wada marnay wax caqabad ah oo ka taagana kumaanu arag dadweynaha iyo hawl wadeenada diiwaan galintuna nooma sheegin. Waxaanan ku ammaanayaa Gudiga doorashooyinka oo xil wayn iska saaray iyo Xukuumadda iyo asxaabta oo ka wada shaqeeyay in gobolkii shanaad ay diiwaan galinta Codbixieyaashu ay si wanaasan uga qabsoonto.Degmooyinka Dhahar iyo Badhan oo dhanka gaadiidka ay uga habsaantay oo aanay agabku gaadhin wakhtigii loogu talo galayna imika meelo ka mid ah way gaadhay oo way ka socotaa inta hadhaynay way ku dhawdahay oo dhakhso ayay u gaadhanaan guud ahaan inta badan goobihii loogu talo galay way ka bilaabantay inkastoo dib u dhac gaadiidku sabab u noqday ay meelaha qaar ka jirto guud ahaan gobolka Sanaag degmooyinkiisana degmada Laasqoray oo aanay diiwaan galintu ka dhacayn mooyaan e gobolka intiisa kale way ka socotaa goobaha yare e aanay gaadhina waxaan rejaynaynaa in ay gaadiid la,aantu din u dhigtay laakiin imika ay gaadhaan.” Ayuu yidhi Guddoomiye Cirro.
Guddoomiyaha oo ka jawaabayay su,aal aanu ka waydiinay sida uu u arko deegaanada gobolka Sanaag ee aanay ka qabsoomin diiwaan galinta Codbixiyeyaashu,ayaa yidhi. “Horta talo la isla qaatay ayay imika diiwaan galintu ku qabsoomaysaa oo ay Xukuumadda,Gudiga Doorashooyinka Asxaabta Qaranka iyo cid kasta oo kala shaqaynaysaa talo ayay ka yeesheen meelaha aanay ka qabsoomayna waa la iska arkay kolay arrimo ammaan ayaana sabab u ah oo gdiga doorashooyinka,Xukuumad iyo asxaabba dedaal badan ayaa la galay intii hawlaha diiwaan galintu ay socotay in ay dalka ka wada qabsoonto laakiin imika degmada Laasqoray ayaanay ka qabsoomayn sababo ammaan oo la xidhiidha in aan sanaadiiqda la gaynayo aan ammaan ahaan la wada damaanad qaadi karayn iyo in diiwaan galinta ay ka horayso in maamul iyo hannaan shaqaynaya oo dawli ahi ay gaadho markaa marba inta suuragalka ah ayaa la qabanayaa dalkana nabad gelyada ayaa u dan ah sidaa darted imika waa la isla qaatay in marka Degmada Laasqoray laga reebo deegaano ka tirsan in ay gobolka Sanaag intiisa kale ka qabsoono.”
Guddoomiyaha oo ka jawaabayay su,aal aanu ka waydiinay cidda leh masuuliyadda degmooyinka diiwaan galin la,aanta ku dhacay ee xilkaasi uu saarnaa,ayaa yidhi. “Kolay xilkaasu wuxuu ka mid ahaa hawsha loo dirtay Xukuumadda ee shaqadeeda ka midka ahaa waxaanay ahayd in ay dalka oo dhan maamulka gaadhsiiso Xukuumaddan iyo kuwii ka horreeyaybana deegaamadan way ka gaabiyeen laakiin marba halka aynu taaganahay in aynu wax ku qabsano oo hore looga sii socdo ayaa muhiin ah maanta diiwaan galinta asxaab,xukuumad iyo gudiga doorashooyinkaba waa laga midaysan yahay xilkaasina dhanka Xukuumadda ayuu hore ugu baaqsaday oo waa xil ay lahayd oo ay gabtay imikana waxaa looga fadhiyaa in ay inta wakhtigeeda ka hadhay in ay iska xil saarto in ay dalka maamulka ku wada fidiso.”
Guddoomiyaha oo ka jawaabayay su,aal laga waydiiyay faro galinta ay deegaanada bariga Sanaag ku hayso Puntland oo sheegata deegaano Somaliland ka tirsan in ay ka taliso ama ay maamul ahaan dhankooda ka tirsan yihiin,ayaa yidhi. “ Puntland waa Maamul goboleed Soomaaliya ka tirsan oo aynu soohdinta aynu Soomaaliya wadaagno aynu jaar ka nahay waa darisnimo iyo ehelnimo labadaba aynu wadaagno waxaan leeyahay daris wanaagga iyo jaarnimada xaqdhawra oo soohdimaha Somaliland aad wadaagtaan xurmeeya oo nabad gelyada iyo jaarnimadu ha idin deeqdo Somaliland maaha dal ama deegaan isir ama qabiil xad u yahay waa qaran xuduudihiisa caalamiga ah la wadaaga guud ahaan dalalka deriska oo ay Soomaaliya ka mid tahay, xadka ay Soomaaliya iyo Kiiniya leeyihiin iyo xadka aad Itoobiya leedihiin iyo soohdinta Somaliland iyo Soomaaliya ay leeyihiin dhamaantood waa xuduudo isku mid ah oo dal kasta madaxbannaanidiisa sugay markaa Puntland waxaan uga digayaa in ay isku dayaan in ay sharci darro iyo xaalad abuur isku dayaan in ay ugu soo xadgudbaan xuduudaha qaran ee dalka Somaliland uu leeyahay. Dal kastana waajib ayay ku tahay in uu difaacdo oo uu sugto soohdimihiisa qaran,Somaliland,na dalkeeda cidna marti uga noqon mayso dal ahaan iyo dad ahaanba darisnimo wanaag iyo iskaashina diyaar ayaan u nahay.”
Guddoomiye Cirro oo bulshada gobolka Sanaag ee ay diiwaangalinta Codbixiyeyaashu saaka u bilaabantay farriin waano ah u diray,ayaa yidhi.” Bulshada goolka Sanaag waxaan marka hore ku hambalyaynayaa sida wanaagsan ee ay ugu diyaar garooben diiwaan galinta Codbixiyeyaasha iyadoo ay gobolka duruufo badani ay ka jiraan oo laga gaabiyay ama aan adeegyadii aasaasiga ahaa deegaano badan oo ka mid ah aan la wada gaadhsiin. Intaa waxaan u raacinayaa in xuquuqda iyo waajibaadka dastuuriga ah ee ay xaqa u leeyihiin in ay wax doortaan isla markaana la doorto in aanay lumin oo ay is diiwaan galiyaan si ay u dooran karaan cidda ay doonayaan isla markaana u muujiyaan codkooda iyo gobolka Sanaag cududiisa.waxaa kale oo aan leeyahay dadka deegaanadooda aan la geyn sanaadiiqda diiwaan galinta arrimo jira dartood ku dedaala in aad doorkan idinku dulqaad badan samaysaan oo aad goobaha idiinku dhaw ee la iska diiwaan alinayo in aad timaadaan oo aad is diiwaan galisaan si aan xaalad jiraa u lumin xaqa aad u leedihiin in aad wax dooran kartaan ama la idiin dooran karo,waxaanan Insha Allah rejaynayaa in ay si nabad gelyo ah inoogu dhamaato waa gobolkii shanaad ee ay ka qabsoonto diiwaan galinta codbixiyeyaasha doorashooyinka soo socda ee Somaliland oo wax badan oo mustaqalka iyo rejada aqoonsi raadinta Somalilandba ay ku xidhan tahay.”
Ugu dambayn Guddoomiye Cabdiraxmaan Cirro oo ka jawaabayay su,aal aanu ka waydiinay isagoo xisbigiisa WADDANI Uu taagan tartanka Madaxtinimada dalka doorashooyinka soo socda ee dalka waxa uga qorshaysan ka xisbi ahaan deegaamada maanta aanay gaadhin diiwaan galinta codbixiyeyaasha dalka ka qabsoontay iyo sida uu u wajahayo,ayaa yidhi. “Horta waajibaadka na saran haddaanu ku soo baxno waa waajiaadkii iyo masuuliyadii Xukuumaddihii horeba saarnaa oo ah in aan dalka Somaliland guud ahaan wada gaadhsiino hannaanka dawliga ah ee ay Xukuumadihii kale ka gaabiyeen waxaana noo qorshaysan haddii aanu talada dalka ku guulaysano in aanay jiri doonin deegaano Somaliland ka tirsan oo aan hannaanka dawladnimo gaadhin waxaana ku gaadhsiin doonaa sida ugu wanaagsan oo ah in dadka deegaanka iyo waxgaradkiisa loo maro oo lala kaashado oo nidaam maamul daadejin ah la sameeyo oo aanay dawladda Somaliland Hargeysa uun iska fadhiyin ee ay dalka oo dhan wada gaadho kuna gaadhi jid nabadeed oo qaran oo ah mid ay dadka iyo dawladdu mid qudha oo Somaliland ah wada yihiin oo ay wax wada leeyihiin.”ayuu yidhi Guddoomiyaha Golaha Wakiiladda Somaliland ahna Guddoomiyaha Xisbiga Mucaaridka ah ee Xisbiga WADDANI oo isagoo ku sugan magaalada Ceerigaabo ee Xarunta Gobolka Sanaag khadka Tilifonka ugu waramay Shabakadda Wararka ee Xogsoormedia.com
Xogsoormedia.com
Hargeisa Somaliland