Qasaa’idkii Macaanaa Ee Wadaaddada Suufiyada, Aqal-Soomaaligii Gaadhiga Saarnaa, Laxdii Calanka Lagu Ranjiyeeyey, Dibidii Meerarneyd Iyo Wacdaraha Muuqaaladii Shalay
Hargaysa (Xogsoormedia.com)- Xuska Sannad Guurada 25aad ee Maalinta qarannimada Somaliland oo shalay dhamaan dalka gudihiisa iyo dalal dhawr ah oo dibadda ah si weyn looga xusay, marka laga yimaad khudbadihii Madaxda kala duwani ka jeediyeen fagaarayaasha dalka, waxa xiiso gaar ah lahaa arrimo badan oo dadku aad ugu dhaygayey oo shalay qurxiyey xuska 18 May, haddii aan gaar u soo qaadano caasimadda Hargeysa.
Dabbaal-deggii shalay shacabka, ciidamada iyo dhammaan umadda Somaliland ugu damaashaadayeen xuska qaranimada Somaliland ee Rubuc jirsatay waxa si gaar ah uga dhex muuqday Culimada Timo-weynta (Suufiyada) loo yaqaano oo wacdaro dheeraad ah ka dhigay fagaarihii dadku ku soo bannaan baxay ee Jidka Wadnaha Hargeysa ee hor mara Madaxtooyada Somaliland, kuwaasi oo socodkooda ku muujiyey iyaga oo Salliga Nabiga NNKHA qaadaya socod ku maray jidkaasi, iyaga oo ku labbisnaa dhar laga sameeyey calanka Somaliland.
Raxan Culimada Timo-weynta ah ayaa iyagoo labbisan dhar cad-cad oo midabka calanka lagu qurxiyey, isla markaana timaha u kala rogay qaabka muqaal ahaan ay caanka ku yihiin waxay socod gaardis ah ku mareen waddada weyn ee Jidka Wadnaha Magaalada Hargaysa oo ay marayeen Ciidamada iyo qaybaha kale ee ka qayb qaadanaayay Xuska Munaasibadaasi. Tani waxa ay si weyn u soo jiidatay shacabkii reer Hargeysa ee u soo daawasho tagay xuska maalintan iyo waliba madaxdii ku sugnaa barxadda salaam sharafta lagu siinayay madaxweyne Siilaanyo iyo madaxda kale ee qarankaba kuwaasi oo markii ay goobahaasi marayeen dadka iyo madaxdu si weyn ugu guuxeen.
Culimada-timo weyntu waxa ay ku luuqaynayeen qasaa’id Nabi Ammaan ah iyo Heeso waddani ah oo ay dalka iyo calanka ku ammaanayeen taasi oo noqotay arrin xiiso badan oo dadku aad uga helay iyada oo maritaankii kooxdan Culimada ahi dadka ka dhex dhaliyey doodo kala duwan oo ay isku waydiiyeen bal in culimada kale ee dariiqooyinka kale ahi ay mar kali ah sidaa u muujin lahaayeen dareenkooda waddaniyeed. Baraha xidhiidhka bulshada iyo guud ahaan dadkii shalay muuqaalka culimada goob-joogga u ahaa waxa ay aad u hadal hayeen sida ay u kala fog yihiin culimada darooqooyinka kale ee dalka ku nool oo in badan oo ka mid ahi aanay aaminsanaynba qaddiyadda umaddan xusaska noocan oo kale ahna u nacaybka ay u qabaan darteed ugu gabbada in ay aragti diineed ku daadafeeyaan.
Si kastaba ha ahaatee culimada Suufiyada oo ahaa kuwa dhaqan ahaan shacabka Soomaalidu meel kasta oo ay ka degaan Geeska Afrika ku ab-tirsato ahaana kuwii suurta galiyey in shareecada islaamku geyigan soo gaadho qarniyo ka hor waxa ay mudan yihiin in lagu bogaadiyo dareenkoodii waddaniyeed ee ay shalay la wadaageen umaddooda.
Dhinaca kale arrimaha xiisaha lahaa ee xuska shalay aadka loogu riyaaqay waxa ka mid ahaa xoolo loo labbisay calanka Somaliland, ardaydii magaalada Gabiley ee samaynayay muuqaallada 18 May, Nin Ku Dabbaal degay Kaarnooye lagu xardhay calanka, dibi meeraran iyo Aqal Soomaaliyadii laba daryaalaha ahaa oo sidodao u diyaarsan oo la soo saaray gawaadhi.
Xogsoormedia.com
Xogsoor@gmail.com
Hargeysa Somaliland
Khadarhoryaal@gmail.com
Xigasho: Foore News.com
Kaarnooye lagu xardhay calanka, dibi meeraran iyo Aqal Soomaaliyadii laba daryaalaha ahaa oo sidodao u diyaarsan oo la soo saaray gawaadhi.
