Hargaysa (Xogsoormedia.com)- Masuuliyiinta Wasaarada Duulista Hawada iyo Gaadiidka Cirka Jamhuuriyadda Somaliland ayaa soo saaray go’aamo lagu adkaynayo amaanka madaarrada dalka, gaar ahaan madaarka Hargeysa oo ay ka joojiyeen shirarka jaraa’id ee lagu qaban jiray qolka nasashada ee madaarka gudihiisa xilliyadda masuuliyiinta dawladda iyo madaxda axsaabta qaranku ay dalka ku soo laabtaan.
Sidaa waxa lagu sheegay shir jaraa’id oo masuuliyiinta sar sare ee wasaaradda duulista iyo hawada Somaliland si wada jir ah ugu qabteen madaarka Cigaal International Airport, waxaanay sheegeen in ay gabi ahaanba joojiyeen soo dhaweynihii lagu qaban jiray gudaha Madaarkaasi.
Agaasimaha Guud ee Wasaaradda Duulista Hawada iyo Gaadiidka Cirka Cumar Sayid Cabdillaahi Aadan ugu horrayn faahfaahin ka bixiyey ujeedada shirkan Jaraa’id waxaanu yidhi “Ujeedada aanu u qabanay shirka Jaraa’id, waxa weeye, in aanu ugu warbixino Amaanka guud ee Madaarrada Jamuuriyada Somaliland oo runtii meel fiican maraya, isla markaana uu yahay qaar la isku halayan karayo innaga oo dal ahaan ku naalla mandaqad Xasaasiya, Ammaankeedu aanu fiicnayan hadda haddii ALLE yidhaahdo waxaanu ku guulaysanay, qadarka ILAAHAY in Madaarradeenu si fiican u shaqeeyaan, hawlahoodii si fiican u wataan, amnigooduna uu noqdo qaar la isku halayn karayo, mar walbana waxaa muhiim ah wixii amnigaa dhibaato ku ah, in aanu wasaarad ahaan ka taxadirno siyaasad ka yeelano, oo aanaan meel kali ah istaagin ee aanu maalin walba tallaabo hore u qaadno si amniga loo xaqiijiyo.”
“Amniga Madaarrada Somaliland waxa caqabad weyan ku ah, oo waligoodna ku soo ahaa soo dhaweynaha faraha badan, ee lagu dhex qabto gudaha Madaarka, iyada oo Madaxweynaha Somaliland Marka uu Madaarka ka baxayana, dhammaan Dawlada iyo Dadka soo dhaweynayaaba gudaha galaan, Madaarka Salaanta lagu bixin jiray, sidoo kale Xisbiyada Qaranka iyo dadka kale ee Mudanka ee reer Somaliland-na Qofka soo degaayaa iyo kii sii baxayaba ay tiro Dad ah oo faro badan ayaa iman jireen, arrintaa runtii wasaarada ahaan in badan ayaanu darsaynay, waanu u kuur galnay, waxana la isu wada waafaqay wasaarad ahaan in arrintaasi tahay arrin khatarteeda leh, oo aan saacidayanin hanaanka amni ee Madaarrada,waxaanu Madaxtooyada u gudbinay soo jeedin waana la naaqishay illaa Madaxweyanaha oo waa la isku raacay Arrintaasi in aanay ahayn Arrin la jaanqaadi karta waaqica,”ayuu yidhi Agaasimaha Guud ee wasaaradda Duulistu.
Mr. Cumar-sayid oo hadalkiisa sii watay waxa uu intaas ku daray “Madaxweynuhu isaga oo Arrintaas fulinaya ayaa socdaalkiisii uu ku tagay Dalka Kuwait Salaantii iyo shirkii Jaraa’idba Madaxtooyada ayaa lagu qabtay, Madaxweynaha iyo Tiro yar ayaa noo yimi, iyaga oo VIP-da maray oo aan cidna ogayn, sidaa ayey ku baxeen, soo degistiina sidaas oo kale ayey ahayad, markaa Shirkayaga Jaraa’id waxa weeye, in aanu maanta halkan ka iclaamino in dhammaan soo dhawaymihii iyo shirarkii jaraa’id ee Madaarka guduhiisa lagu qaban jiray aanu joonjinay, hadday tahay Asxaabta Qaranka, hadday tahay Madaxweyanaha qarankaba oo isugu hore noogu fuliyey, hadday tahay Baarlamanka haddii ay tahay Mudanka Reer Somalilandba.”
Wasiiru-dawlaha Wasaarada Duulista Axmed Nuur Faahiye oo isaguna Shirkaas jaraa’id ka hadlay ayaa ka waramay Mashaariic socota iyo qaar dhammaaday oo ay fulisay Wasaarada Duulistu, waxaanu yidhi “Waxaanu dhisnay darbiyo Dhaadheer, oo aanu kor u kicinay, dhirtii waaweynayd ee koonfurta Madaarka ku taallay, waanu goynay,waxaanu samaynay oo kale Albaab laga soo galo Madaarka oo aanu ka dhisayno goob dadka lagu baadho oo aanu dhigayno Mishiinkii Hubinta Dadka iyo Alaabada si marka qofka kaas lagu soo baadho uu u yimaado oo lagu baadho kan uu hada baadhitanku ka bilaabmo.”
Wasiirka Wasaarada Duulista Cumar Sheekh Maxamed Faarax ayaa isna ku dheeraaday Amniga iyo sida loogu baahan yahay, iyo qoraalo ay u gudbiyeen Xisbiyada Qaranka, waxaanu yidhi “Waxaanu isku daynay in aanu wax ka qabanno intii suurto gal ah Nabadgalyada, Xasiloodi Madaarrada Somaliland, oo maanta Madaarka Hargeysa waxa uu noqday Bariga Africa, marka laga reebo Ethiopia, madaarka kaliya ee laga soo dego ama laga dhoofo ILAAHAY ayaa mahad leh, haddii aanay Nabad-gelyo jirina waxba ma jiraan, harumarna ma jiro, haddii aanay Nabad-gelyo jirina Caafimaad ma jiro, Haddii aanay nabad-galyo jirin nololi ma jirto, ILAAHAY ayeynu ugu mhad naqayanaa ammaanka uu innagu manaystay.”
“Xisbiyada Qaranka warqad ayaanu u qornay, oo aanu ka codsanayno sidaa uu Madaxweynuhu ogolaaday, ee isba naga yeelay, in ay iyaguna Xafladahooda iyo soo dhaweyanhooda ku qabsadaan xarumahooda waa Kulmiye, waa UCID, waa WADDANI, saddexda xisbi qaran, oo uu noqdo Madaarku meel laga soo dego lagana dhaafo,” Ayuu yidhi Wasiirka Wasaarada Duulista Cumar Sheekh Maxamed Faarax .
Xogsoormedia.com
Xogsoor@gmail.com
Hargeysa Somaliland
Khadarhoryaal@gmail.com
Xigasho Dawannews