Hargeysa(Xogsoormedia.com):- Wasiirka Wasaaradda Gaashaandhigga Somaliland Axmed Xaaji Cali Cadami,ayaa wax aan soconayn ku tilmaamay isku day kasta oo Masar ka yimaadda oo ay ku doonayso in ay ku waxyeelayso xidhiidhka walaalnimo ee soo jireenka ah ee ka dhexeeya Somaliland iyo Itoobiya oo uu tilmaamay in uu yahay mid ka qoto dheer oo ka gudbay marxalad ay cadaw ka dhex shaqaysan karaan.
Wasiirku waxa kale oo uu ka hadlay xaaladda Abaaraha Somaliland oo uu sheegay in ay xilligan ka taagan tahay dhulkii iyo deegaanadii markii hore ka ladnaa ee dhanka Bariga Somaliland.
Waxaa kale oo uu Wasiir Cadami ka hadlay 25 Sanno oo ay jirtay ka dib halka ay u socoto oo uu sheegay in ay tahay halganka dhammaystirka Qaranimada iyo ka midho dhalinta aqoonsi buuxa oo dalka Somaliland uu caalamka ka helo,taasoo uu sheegay in aan laga daalayn isla markaana aan laga caajisayn lana heli doono.
Waxaanu sidaa ku sheegay waraysi gaar ah oo uu Wargeyska DAWAN iyo TV-ga qaranka shalay ku siiyay xafiiskiisa.
Ugu horrayn Wasiir Axmed Xaaji Cali Cadami oo ka jawaabayay su’aal laga waydiiyay xaalada Abaaraha Somaliland iyo wakhtigan deegaanada ugu daran ee ay ka jirto,waxa uu yidhi “Horta Raxmaadkii ALLE iyo Roobabkii gu’gu way innoo curteen oo dalka meelo way ka hooreen, dhul uu ku badan yahay iyo dhul uu hogol hogol ku yahayba way jiraan deegaanno aanu ka tiixin oo aanu wali helin isla markaana ay abaaro imika ka taagan yihiina way jiraan.
Dalka imika abaaruhu waxay ku badan yihiin oo ay halistaasi ay ka jirtaa deegaamada gobollada Bariga dalka Sanaag,Togdheer Buuhoodle,Sool iyo Badhan intaba way ka jirtaa gurmadkana abaarahana dhankaa ayaa wakhtigan xoogga la saarayaa kol haddii ALLE innagu guuleeyay in aynu dadkii markii hore gurmadka u baahnaa aynu gaadhsiinay hayn iyo deeq wixii ina soo gaadhayba,laakiin waxaa wax ALLE loogu mahad naqo ah in dadkii oo dhimanaya in Rabbi innagu garab galay gurmadkii iyo qaylo dhaantii aynu samaynay waxaanad dareemi kartaa marka adigii gurmadka ku jiray iyo ciddii kuu gurmatayba markaad tagtaan ee aad indhihiina ku soo aragtaan Hooyo laba caruur ahna daadahaynaysa midna uurka ku sidda midna xambaarsan oo ka madhan dhammaan wax kasta oo nolol suura galin kara hadday cunto tahay,hadday wax la xidho ama huwato tahay.”
“Waxaan indhahayga saaray weftigii Imaaraadka madaxdii ka socotay ee raashinka caawimada ah keenay oo markii ay arkeen xaqiiqada taalla ooyay oo laba aamusiin kari waayay oo yidhi dhibaatadiina in aad dabooshaan ayaad isku daydeen oo aad u dhaqaaqdeen haddaad tihiin Dawladda Somaliland laakiin tani mid ay dawladaha waawayn ee caalamka ugu awooda badani xataa kafayn karaan maaha oo qiiro ooyay.
wax kastana ALLE,ayaa qadaray markaa odhan mayno roobkii baa curtay oo dadkii waxba uma baahna ee gurmadka waa loo wadayaa illaa inta ay dadka noloshoodu soo noqonayso,deegaanadii markii hore ladnaa ee daaqa iyo biyahaba lahaa ee la isugu tegay oo imika abaartu ka jirtana gurmad dhakhso ah ayaa lala gaadhayaa oo qorshaysan,”ayuu yidhi Wasiir Cadami.
Wasiir Cadami waxa uu sheegay in madaxweynaha Somaliland uu asiibay magacaabista guddida gurmadka abaaraha oo wax weyn qabtay, waxaanu yidhi “imika shalay(Dorraad)waxaanu socdaal kaga soo noqnay dalka Jabuuti oo ah dal aynu daris iyo walaalaba nahay oo deeq gurmadka abaaraha ay kaga qayb qaadanayeen nagu soo wareejiyay.markaa deegaan kasta oo abaartu ka jirto cid kasta oo gurmadka taakulaynta ah u baahanba way gaadhaysaa Guddiga abaaraha ee heer qaran,waxaanan ku ammaanayaa Madaxweynaha Qaranka oo asiibay samaynka guddigan oo uu ku dhawaaqay wakhti loo baahnaa,waxaanay guddigani ka kooban tahay Masuuliyiin qaran,culimo,ganacsato waxaanan leeyahay wax kasta oo khayr ah oo aynu ku dhaqaaqayno waxaynu gudigan ka baranay in wada jir iyo is kaashi wax lagaga qaban karo.”
Wasiirka oo ka jawaabayay in Gudigu ay wax ka barteen dhibaatada ay abaaruhu geysteen isla markaana ay qorshaha ku darsadeen sidii looga gaashaaman lahaa iyo in ay ku kooban yihiin in ay dadka wax gaadhsiiyaan oo kaliya,ayaa yidhi. “Horta arrimuhu way kala horreeyaan xaalad kastaana mar ayay taagan tahay markaa marxaladda taagnayd waxay ahayd gacan iyo af oo waxaa loo baahnaa ee gurmadka loo samaynayayba waxay ahayd sidii loo badbaadin lahaa dad dhimanaya oo duunyadii ay dhaqanayeen iyo iyagiiba is raacaya imikana waxaynu ku hawlanahay wali gurmadkii abaaraha oo dalka ka taagan oo dadkii xooluhu ka baxeen iyo beeralaydii saddexda sanno aanay waxba beeraha uga soo go’in oo ka madhan dhammaan wax kasta oo nolol u suura gelin kara ayaa gurmadkooda lagu jiraa.
marka dhankaa laga soo jeesto,waxyaabaha aanu ka baranay abaarta ee qorshayaasha noogu jira waxaa ka mid ah in dhaamam biyood dalka laga qodo in riigag intii la awoodo la soo saaro oo ceel biyoodyo la qodo,in seerayaal xoolaha loo xidho iyo in awood badan la galiyo sidii wax kayd ah loo samaysan lahaa isla arkaana la baro dadka in isu tagga iyo guddiyada wada jirka ah lagu dedaalo oo wax wada qabsiga iyo is taakulaysiga lagu midaysnaado. waxaa kale oo aanu ka baranay in deegaanada gurmadka loo samaynayay ee samaystay Guddiyada heer gobol in ay noqdeen dad ka shidaal qaatay aasaaska Guddiga heer qaran ee
Wasiirka oo wax laga waydiiyay sida uu u arko ciidan la sheegay inay Masar u samaynayso dawladda Muqdisho iyo hagar daamooyin la sheego inay masar ku hayso xidhiidhka saaxiibtinimo ee Somaliland iyo Itoobiya, waxaanu yidhi “Horta markii la odhan jiray Soomaaliyaay cadawgaagu waa Itoobiya ee dalkii la isku odhan jiray Soomaaliya Iyo Itoobiya laga dhex shaqaysan jiray wuu soo dhammaaday oo maanta waxa jira laba dal oo la kala yidhaahdo Somaliland iyo Soomaaliya, Somaliland iyo Itoobiya xidhiidkooduna wuu ka weyn yahay oo wuu ka qoto dheer yahay mid kale oo fidmo wadda looga baqdo. midna way jirtaa oo inta dunidu jirto Masar iyo Itoobiya xafiiltan wuu ka dhaxaynayaa oo waxaa sabab u ah Wabiga. laakiin Masar, Itoobiya nacayb ay u qabto Somaliland uma soo dhex marin karto oo isku dirkaa waa laga gudbay Somaliland iyo Itoobiya waa laba dal oo walaalo ah. waa laba dal oo saaxiib ah. waa laba al oo dunida kale oo dhan iskaga dhow waa laba dad iyo dal oo isku damqada oo dan iyo deegaan wadaaga Masarna looga baqan maayo in ay fidmo ka dhex hurin karto,haddii ay Soomaaliya ciidan u dhisto oo ay hub ugu deeqdana waxaan u arkaa in aanay nasteex u ahayn ee ay dab isugu dhiibayso sababtoo ah dawlad dhisan oo ciidan leh,ayaa hub loogu deeqaa markaa hadday Soomaaliya wax u dan ah u qabanayso wax kale oo badan oo hub u dhaama ayay u baahan yihiin ee ha u qabato.”
Xogsoormedia.com
Xogsoor@gmail.com
Hargeysa Somaliland
Khadarhoryaal@gmail.com
Xigasho: Dawannews.com