Hargeysa(Xogsoormedia.com):- Guddoomiyaha UCID ee Gobolka Saaxil Marwo Rooda Axmed Yaasiin,ayaa weerar gurigeeda lagu qaaday xalay ku eedaysay Xisbi Xaakimka Somaliland ee KULMIYE iyo Xukuumadda waxaanay sheegtay in ay booliska gaadhsiisay waxna aanay ka qaban oo aanay illaa mika wax tallaabo ah qaadin cidna aanay soo qaban.
Guddoomiye Rooda Axmed Yaasiin oo goor dhawayd u warantay shabakadda Wararka ee Xogsoormedia.com,ayaa sheegtay in Inan ay dhashay kooxda Gurigeeda soo weerartay in ay Mindi ku dhaawaceen isla markaana ilkaha ka gaadhiiyeen dhaawac kale.
“Anigu guriga waan ka maqnaa markii la soo weeraray waxaana joogtay inan aan dhalay oo ay mindi ku dhaawacen isla markaana ilkaga wax kaga dhufteen, lix nin ayaanay ahaayeen oo markiiba way baxsadeen booliskana waan gaadhsiinay laakiin wali cid naloo soo qabtay ma jirto.”
Rooda Axmed Yaasiin oo aanu waydiinay cidda ay u tuhmayso weerarka gurigeeda lagu qaaday ayaa tidhi “Waxaan u tuhmayaa oo tartanka siyaasiga ah ee naga dhexeeya godob u qaatay oo siyaasadda si xun u adeegsada Xukuumadda iyo Xisbigeeda KULMIYE weerarkanna iyaga ayaa geystay booliskuna wax tallaabo ah may qaadin, horena waxaan ugu geeyay hanjabaado tilifoono ah oo ay waxba ka qaban waayeen markaa tanina waa tallaabo kale oo ay Xukuumadda iyo KULMIYE igu soo weerareen laakiin anigu joojin maayo in aan ka hadlo mar kasta waxaan arko in ay qaldan yihiin hawlaha Xisbigaygana waan sii kordhinayaa oo hanjabaad iyo weerar kuma joojinayo.”
Xogsoormedia.com
Hargeisa Somaliland