Berbera(Xogsoormedia.com):-Allae ha u naxariistee waxaa caawa qabuuraha magaalada Berbera aas qaran iyo sagootis loogu sameeyay Marxuum Xidigle Aadan Guuleed Daahir oo ahaa taliyaha ciidanka Birmadka booliska ee gobolka Saaxil oo uu dorraad askari Boolis Cabdirisaaq Maxamed Khayre toogasho ku dilay waxaanay shalay Maxkamadda ciidanka ee derejada koobaad ay dil toogasho ah ku xukuntay gacan ku dhiiglaha oo ciidanku gacanta ku hayaan.
Aaska Marxuumka oo ay xalay ka qayb galeen Madaxda gobolka Saaxil oo uu ugu horreeyo Guddoomiyaha gobolka Fahmi Cabdi Bidaar, Maayarka degmada Cabdishakuur Maxamuud Ciddin iyo Masuuliyiinta laamaha dawladda ee kala duwan, taliyeyaasha ciidamada heer gobol iyo degmo ee Saaxil iyo Berbera.Culimo awdiinka magaalada iyo dadweyne aad u tiro badan oo kale.
Aaska marxuumka ayaa ka dambeeyay ka dib markii Marxuumka qoyskiisu ay ku qanceen in la aaso lagana war sugo xukunka Maxkamadda oo derejadii koobaad maanta ku xukuntay gacan ku dhiiglihii dilka taliyaha geystay Xukun dil ah.
Waxaanay isku af-garteen masuuliyiinta gobolka iyo ehelada uu ka baxay taliyaha geeriyooday in ay ka wada war sugaan derejada labaad ee Maxkamadda iyo xukunka ka soo bixi doona.
Xogsoormedia.com
Hargeisa Somaliland