Saameynta Ay Abaartu Ku Yeelatay Degaannada Maroodijeex, Hawd iyo Gabiley+ Sawirro Dareen Xambaarsan Oo Laga Soo Qaaday Dadka Ay Abaartu Saamaysay.

Hargeysa(Xogsoormedia.com) Abaar baahsan oo ka dhacday Gobolada Maroodijeex , Hawd iyo Gabiley ayaa waxaa ay saameyn weyn ku yeelatay dadkii iyo duunyadii ay haysteen.

Abaartan oo aheyd mid ka dhalatay roob la,aan baahsan oo ka jirtay guud ahaan goboladan aynu soo sheegnay, maada la waayay roobabkii xiliga Gu,ga.

Roobabkan ayaa aan sidii loogu talo galay aan u di,in ayaa keentay in wadanka abaar baahsanoi ay ka dhacdo, iyada oo dadka wixii awood ulahaa inay guuraan ay guureen oo ay cagahooda miciin bideen,si ay u raadsadaan meeshan meel dhaanta oo ay ku badbaadan.

islamar ahaantaana ay xoolihii ula hayaamaan dhanka dalka aynu jaarka nahay ee itoobiya.

dhibaato aad u daran ayay abaartu soo gaadhsiisay deegaanada iyo degmooyinka hoos yimaada gobolada Maroodijeex , Hawd , iyo Gabilay.

dhibaatooyinka aadka u daran ee goboladan soo gaadhay ayaa ah biyo la,aan baad, la,aan, iyada oo beeraha la qoday oo aan beerihiina wax saac ahi aanu ka soo bixin taasina ay tahay ta keentay dhibtan iyo rafaadkan aan kala go,a laheyn ee deegaanadaass ka dhacday.

Taasina waxaa ay keentay in neefafkii ruqaha ahaa ee ka badbaaday abaartaa ay ku badbaadiyaan, raashinkii keydka u ahaa ee ay islahaayeen kaga baxaa abaarta.

Waxaanay dadka ku khasabtay inay qaylo dhaan u diraan dawlada Somaliland iyo cidkasta oo ay isleeyihiin waxbay idinka qaban kartaa abaartan dad iyo duunyaba meesha ka saartay., waxaanay Hay’adaha caalamiga ah ugu baaqeen inay wax kala qabtaan arintan qalafsan ee ay abaartani keentay.

ilaa 13 Tuulo oo ay soo kormeertay wasaarada,beeraha Somaliland oo ay warbaahintu qayb ka aheyd, ayaa waxa ay indhahooda ku soo arkeen inaan midina mid ka dhicin tuulooyinka ay abaarta baahsani haleeshay , waxaana tuulo kasta laga dareemaya cidlo caarsila.

Waxaanad tuulo kasta aad ku arkaysa in buulashi dadku ay galayeen inta la rabaaliyay layskaga tagay oo aan dib loogu soo noqon.

Ka  dib markii dadkii ku hareeraysnaa ee ay Magaalada u ahayd xoolahooda wixii abaarta ka hadhay kala guureen, waxaana tuulooyinka qaarkood indhahaagu qabanayeen neefaf xoola ah oo aan badnayn laakiin diif iyo tamar daro xoog ahi ay ka muuqato, waxanay inta badan ku nool yihiin neefafka ay naftu ku sii jirto raashinka uu reerku karsado oo wax laga siiiyo.

TOON:

Deegaanka Tuulada Toon oo kormeerku ka bilaabmay, ayaa marka aad gudaha u gasho waxa ugu weyn ee dadku ka wer-werayaan yihiin Biyaha, ka dib markii Baraagihii ay Biyaha ka cabbi jireen dhammaadeen, “Dadku halkan way ka guureen Abaarta awgeed, aniguna dadka tuulada ayaan ku caawiyey gaadhi waxayna biyo kaga doonanayaan Qool-caday” sidaa waxa sheegay mid ka mid ah dadka tuulada Toon oo gaadhigiisa biyo loogu doonay dadka deegaankaas. Waxaanu intaa ku daray, “Qool-caday waxay Toon u jirtaa dhowr iyo toban KM, meesha kale ee ugu dhowna waa Hargeysa.

Guddoomiyaha Nabadgalyada ee Tuulada Toon Xariir Aadan Dhuule oo Xoolihiisa abaarta awgeed u raray deegaanka Awaare, ayaa sheegay, “Anigu waxaan ka soo laabtay deegaanka Awaare oo aan geeyay Halo (Geel), markii Xoolihii aad u dhinteen.” Ayuu yidhi, isagoo ka dayrinaya heerka Abaartu gaadhsiisan tahay.

Habaas-weyn

Deegaanka Habaas-weyn, ayaa ka mid ah meelaha dhibaatadu ka soo gaadhay Abaarta sannadkan ku dhufatay Gobollada Somaliland, sida uu sheegayo Guddoomiyaha Habaas-weyn, “Sannadkan Roobkii deyrtu muu helin deegaankan, waana laga hayaamay oo cidna ma joogto.” Ayuu yidhi, Guddoomiyuhu,  waxaanu intaa ku daray, “deegaanka Wax Sarac ahi kama bixin mid Dad iyo Xoolaad, sidaa daraadeed ILLAAHAY baanu baryeynaa inuu abaarta naga soo jabiyo.”

Cilmi-qabad (Cuna-qabad):

Deegaanka Cilmi-qabad, ayaa ka mid ahaa deegaannada abaartu saamaysay waxaana dadku ku sii hadhsan codsadeen gurmad bani-aadamnimo, “Dadka halkan ku hadhay Raashin ma hayaan, Biyo ma hayaan, wax alaale iyo wax ay hayaan ma jiro, sidaa daraadeed waxaanu doonaynaa in Dawladda iyo Hay’aduhu gacanta ugu weyn noo fidiyaan ILLAAHAY baa gacan weyne. Beertaa afar jeer baan qoday oo waataa Cas.” Ayuu sheegay Cumar Maxamed Ibraahim

Abaartan oo sidoo kale saamaysay deegaannada Fahda, Garabis, Gadhka-yogolka, Abuuriin, Xidhinta, Guul Alla, Taysa, Ijaara, Kurjiga iyo guud ahaan deegaannada ku xeeran isla-markaana dadkii degganaa xoolahooda intii abaarta ka hadhay ula guureen deegaannada Gudaha Itoobiya iyo bariga Somaliland, ayaa waxyaabaha ugu naxdinta badan waxa mid ah in Dadka qaarkood Xoolihii ka dhamaadeen, “Neefkan adhiga ah waxaan siiyaa Shaaha Maqaaxiyaha iyo wixii raashin loo helo.” Sidaa waxa sheegay mid ka mid ah dadka kormeerayaashu la kulmeen oo Adhi ka badnaa boqol neef abaarta ka raacay. Balse, arrinta ay dadkani Wadnaha farta kaga hayaan, ayaa ah in xanuuno ka dhashaan biyo wasakhaysan oo ay ka cabbaan Baraagaha biyaha yari ku sii hadhsan yihiin.

“Abaartii waxay u soo gudubtay Dadkii, waayo? waad yaabaysaa biyaha ay dadku cabbayaan sida ay khatarta u yihiin ee ay Bakteeriyadu uga muuqata.” Ayuu yidhi, Ismaaciil oo ka mid ah dadka ku dhaqan deegaanka Xidhinta ee Gobolka Gabiley.

Abaartan oo aan ku koobnayn deegaannada aynu kor ku sheegnay, hasa-yeeshee  saamaysay Waqooyiga Gobolka Maroodi-jeex, Awdal, Gabiley iyo deegaanno kale, ayaa waxa ka hadlay Afhayeenka Wasaaradda Beeraha Somaliland Mr. Sacad Muuse Cabdi iyo Isku-duwaha Wasaaradda Beeraha ee Gobolka Gabiley Cabdirisaaq Sheekh Muxumed Gaboobe oo kormeerkan sameeyay, waxayna ka markhaati kaceen dhibaatada Abaartu soo gaadhsiisay Dadka iyo Duunyada, “Kormeerka aanu samaynay waxaanu kala soo kulanay in Dadku Shan jeer in ka badan beerahooda qoteen, laakiin aanay wax Dalag ahi uga soo bixin oo ay khasaare badan kala kulmeen. Waxa kale oo ay noo sheegeen in Xoolihii ka dhammaadeen oo ay gurmad u baahan yihiin.” Ayuu yidhi, Afhayeenka Wasaaradda Beeraha Somaliland.

Isku-duwaha Wasaaradda Beeraha ee Gobolka Gabiley, ayaa isaguna kormeerkaas ka dib sheegay, “abaartani waxay ka dhalatay Roob la’aan, waayo? waxa la waayay Roobkii Diraacda la odhan jiray, Xagaagiina wuu ku biiray, Karantii iyo Darantiina wax yar baa ka da’ay, dhulkii la beerayna wax ka soo biqlay oo ka soo go’ay ka ma jiraan.”

Xogsoormedia.com

Xogsoor@gmail.com

Hargeysa Somaliland

Xigasho : Ramaas News.com

Sawirkani waa Beeralay la dhakafaarsan Saamaynta Abaartu ku yeelatay noloshooda.
Deegaanka Kurjiga ee Gobolka Gabiley (Photo/Sawir Qaade A.a. Carab/ W. Beeraha JSL)

Geel ku sii hadhsan Goob ay abaartu Saamaysay.
Deegaanka Kurjiga ee Gobolka Gabiley (Photo/Sawir Qaade Cabdiraxmaan Muuse/ SLNTV/ W. Beeraha JSL)

Lo’ abaartu saamaysay oo ku xidhan Geed ku dhaw reerka leh, isla markaana lagu quudiyo raashinka Dadku cunaan.
Deegaanka Garabis ee Gobolka Maroodijeex (Photo/Sawir Qaade: Jeestaawi/ W. Beeraha JSL)

Xayn Adhi ah oo ku foorara Goob Abaar ah.
Deegaanka Aburiin ee Gobolka Maroodijeex (Photo/Sawir Qaade Jeestaawi/ W. Beeraha JSL)