Hargeysa(Xogsoormedia.com) Afhayeenka salaadiinta dhaqanka somaliland Suldaan Yuusuf Maxamuud (Xiiray) oo maantta la hadlaayay qaarka mida ayaa ka hadlay xaalada siyaasadeed ee dalka.
Af-hayeenka salaadiinta dhaqanka somaliland Suldaan Xiiray waxa uu shacabka somaliland u soo jeediyey inay ilaashadaan amaanka qaranka, waxaanu faah faahin ka bixiyey xubnaha iska casilay xukuumada iyo saamaynta ay yeelan doonaan.
Isaga oo arrimahaas ugu horeyn ka hadlaayana waxa uu Suldaan Xiiray hadalkiisa ku bilaabay“Anigu bulshada somaliland oo dhan ayaan suldaan u ahay, mid siyaasiya iyo mid wadaad ahba, waxaan fariin u dirayaa shacabka somaliland oo aan leeyahay shacabow waa inaad ilaashataan nabadiina iyo qaranimadiina, waayo waxa danteenu ku jirtaa nabad galyadaas aynu ku shaqaysanayno.”
Dhanka kale waxa uu Suldaan xiiray u soo jeediyay xubnaha ku tartamaya golaha dhexe ee xisbiga Kulmiye inay hishiiyaan ka hor inta aanay tagin miiska Doorashada waxaanu yidhi “Dadku way idin doorteen, Madaxdii shalay xukumaysay ayaanad tihiin, waxaanan idiin soo jeedinayaa inaad miiska wada hadalka iskugu timaadaan oo qolo walba tanaasul samayso, Anaguna waxaanu jecelnahay inaad miiska wada hadalka iskugu timaadaan oo aad heshiisaan, taas oo umada reer somaliland dani ugu jirto”
Ugu danbeyntiina waxa uu Suldaan Xiiray ayaa madaxweynaha kula dardaarmay in uu odaytinimo muujiyo waxaanu yidhi isaga oo arinkaas ka hadlaya “Madaxweynaha Qaranka Waxan Leeyahay adigu Aabe Ayaad u wada tahay labada dhinac iyo Guud ahaan Somaliland waayo waxaad tahay odaygoodii waxaad tahay Madaxweynahoodii, Waxaanan Madaxweyne ku leeyahay Adigu Odaynimo muuji oo dhexdhexaadnimo muuji dadkani waa dadkii aad odayga u wada ahayd anagu Suldaan ayaan u wada nahay Labada Dhinacba”.
Xogsoormedia.com
Xogsoor@gmail.com
Hargeysa Somaliland
