Hargaysa:(Xogsoormedia.com):- Musharaxa Jagada Madaxweynaha Xisbiga Mucaaridka ah ee UCID Jamaal Cali Xuseen,ayaa bulshada uga digay in ay doorashooyinka soo socda sidii kuwii hore oo kale wax u doortaan,waxaanu ku adkeeyay in ay ka fekeraan cidda ay xilkooda ku aaminayaan.
Waxaanu bulshada reer Somaliland ku dar daaray in ay ka fogaadaan qabyaalad in ay cid ku doortaan,waxaanu tilmaamay in Somaliland dhaqaale ahaan isku filantahay loona baahan yahay in ay inta ay haystaan in la hagaajiyo oo dalka wax loogu qabto.
Waxaa kale oo uu ka hadlay doorashooyinka soo socda oo uu sheegay in bulshada looga baahan yahay in ay si sidii hore ka duwan wax u doortaan isla markaana hoos u eegaan cidda ay dooranayaan kana fogaadaan qabyaalad.
Waxaanu sidaa ku sheegay qoraal uu xalay soo saaray oo uu kaga hadlay arrimo dhawr ah.
“ Dalkeenu wuxuu leeyahay xoolo-nool, macdan, kheyraad dabiiciya, Bad weyn, iyo dhul beereed. Haddana dadkeenu ma badna. Inagoo intaas oo dhan leh baa haddana dadkeenii ay saboolnimaddii iyo gaajaddii ku sii badatay oo ay weliba maalinba maalinta ka danbeysa ka sii daraysaa. Danyarta Somaliland waa qayb ganacsi ama shaqo yar la tacaala. Laakiin qaybta ugu badan ee bulshaddu waa kuwa aan dab loo shidin oo ay u dheer tahay caafimaad darro, Da’, shaqo la’aan, Tahriib, iyo hooyo silic u dhamaaday oo lacagtii furashadda ilmaheedda tahriibay dadka ka baryeysa.”
Mar uu ka hadlayay duruufaha nololeed ee ku gedaaman qoysaska danyarta ah ayuu yidhi Musharax Jamaal.
“Waxa kale oo jira Hooyo iyo Aabbo bil walba ka naxsan fiiga caruurtooda waxbarashadooddii, laydhkii, iyo biyahii. Waxa jira dhalinyaro rag iyo dumarba leh oo ka werwersan mustaqbalkoodda oo qaarkood wax barteen, qaarkoodna ka niyad jabeen. Haddaba maxaa sababay? Ummad waxa haga Madaxdeedda oo Madaweynahu ugu horreeyo, oo ay soo raacaan Baarlamaankeedda, waxgaradkeedda, Garsoorkeedda, Xisbiyadeedda iyo Shacabkeedda. Waa inta isku dheelli tirta ee ka ilaalisa Musuqmaasuqa, iyo maamul xumadda. Horumarka dalka iyo daryeelka dadweynaha waxaa ka masuul ah Madaxda. Shacabkuna waxay ka masuul yihiin in ciddii ugu mudan ee shaqadda kartideedda iyo aqoonteedda leh ay qortaan si aanay dhexda farta uga qaniinin mar walba. “
Ugu dambayn waxaa uu bulshada kula dardaarmay in aanay sidii hore ee ay wax u dooran jireen in aanay waxba u dooran isla markaana ay ka fogaadaan qaababkii hore ee ay wax u dooran jireen oo uu sheegay in ay ahayd qabyaalad iyo u xaglin dhanka reeraha iyo tolnimada ah.
“Shicibku yaanay sidii hore wax u dooran doorkan ee waa inay hoos ugu daadegaan, dadkuna aanay qabyaalad ku dooran. Doorashadda soo socota shayga ugu muhiimsani Waa dhaqaalaha iyo Daacadnimadda. Waxa soo raacaya Nabadgelyadda, iyo adeegyadda bulshadda sida caafimaadka, biyaha, iyo waxbarashadda. Laakiin Dhaqaalaha ayey wax waliba salka ku hayaan maadaama aanad shaqo abuur sameyn karin hadduu dhaqaalahu liito. Caafimaad iyo biyo heli maysid haddii dhaqaalahu inaga xun yahay. Ictiraaf lama raadin karo hadduu dhaqaalahu xun yahay. Nabadgelyaddu khatar bay geli kartaa hadduu dhaqaalahu xun yahay. Dalku waa shirkad ay shacabku leeyahiin. Shirkadaadda hadaad qoratid qof danbi soo galay, ama wax soo dhacay; ma waxaad ka filaysaa in qofkaasi uu noqdo shaqaalle fiican. Madaxda dalka ha loo eego sida marka shaqooyinka la qoranayo oo kale. Qof walba CV giisa ama taariikhdiisa shaqo, waxbarasho, horumar, iyo nololeed dib ha loogu noqdo. Allahayoow wanaaga na garansii. Jimce wanaagsan dhamaantiin.”
Xogsoormedia.com
Hargeisa Somaliland