Hargeysa(Xogsoormedia.com) – Guddi Beeleed ka mid ah guddi beeleedyada reer Somaliland,ayaa Xukuumadda ku dhaliilay xadhiga qaar ka mid ah Madaxdhaqameedka Reer Somaliland oo maalmihii u dambeeyay ku xidhnaa magaalada Hargeysa.
Qaar ka mid ah Madax-dhaqameedka iyo odeyada guddida tallo iyo tawfiiq ee Beelaha Habar Yoonis, ayaa si adag u cambaareeyey xadhiga ay xukuumaddu u gaysatay Suldaan Mawliid Sabbeyso oo ay dhawaan xabsiga u taxaabtay ka dib markii uu ka hadlay mooshinkii Haamaha ee sababay dagaalkii gacan ka hadalka ahaa ee dhex maray guddoomiyaha golaha Wakiilada iyo ku xigeenkiisa 1aad, waxaana ay wax laga xumaado ku tilmaameen qaabka loo xidhay, iyaga oo tilmaamay in loo soo qabtay qaab argagaxisnimo oo aan loo eegin milgaha iyo sharafta ay leeyihiin madax-dhaqameedku.
Odeyadan, ayaa hadalkan ka sheegay shir-jaraa’id oo ay maanta ku qabteen magaalada Hrgeysa,waxaanay Xukuumadda ugu baaqeen in ay si deg deg ah xorriyadooda ugu soo celiso Suldaan Mawliid Sabbeyso iyo sida oo kale Boqor Raabi Cabdillaahi oo maalmihii u dambeeyay ku xidhnaa magaalada Hargeysa.
Ugu horrayn Jiif Caaqil Cabdi Guuleed oo arrimahaa ka hadlayyna wuxuu hadalkiisa ku bilaabay sidan.“Halkan waxa aan ku fadhinnaa odeyaashii beel weynta Habar Yoonis oo uu hoggaaminaayo guddoomiyahii guddida Tallo iyo Tawfiiq, waxa aan doonaynaa in aanu ka hadalno waxa ka dhacay guriga sharafta leh ee Subeyr Awal oo ah weerar argagaxisnimo oo lagu qaaday gurigaas oo ah weerar xornimada ka baxsan, guriga waxa fadhiyey Suldaankii guud ee beelaha Subeer Awal, annaga cirka iyo dhulka waa uu nagala weyn yahay, ninka ciyaar u haystoow annaga Saldanadda Subeer Awal cirka iyo dhulka waa ay nagala weyn tahay, nin Allaale iyo ninkii halkaas wax yeela ama ku gefa waa nin Somaliland oo dhanba wax yeelay. Arrinkaas qaadan mayno, wax aan halkan ka cambaaraynaynaa xadhiga xurmo darrada ah ee Suldaan Mawliid Sabbeyso, haddii Mawliid lagu xidhay run uu sheegay ninka xidhay waxa uu doonayaa been iyo wax kha khal ah. Waxa aan qabnaa in ninkii soo xidhay ee qoriga ku weeraray guriga Saldanaddu in uu khal khal wado oo annaga ayaa madaxdii dhaqanka ah oo qaadan mayno arrinkaas.”.Ayuu yidhi Jiif Caaqil Cabdi Guuleed.
Jiif-caaqilka oo hadalkiisa sii wata,ayaa intaa ku daray:“Waxaana aan si deg deg ah oo ah 24kii saacaddood ee ay beeshu u qabatay ah, in lagu sii daayo ayaanu ku baaqaynaa oo aanu soo jeedinaynaa iyo sida oo kale Boqor Raabi oo isna ka horeeyey.”.
Xogsoormedia.com
Hargeisa Somaliland