Qaadhaan bixiyayaasha iyo guud ahaan bulshada caalamka ee manta quusta ka joogta maamulka Madaxwayne Silanyo waa kuwii beryaha qaar odhan jiray “SOMALILAND KU DAYSHO AYAY LEEDAHAY” ee qiri jiray geedi socodka qaran dhiska Somaliland ilaa ay gaadheen heer ay ku tilmaamaan “MUCJISADA AFRIKA”. Hadii ay sidaa ahayd waxa iswaydiin leh waxa keenay niyad jabka bulshada caalamka gaar ahaan daneeyayaasha Somaliland ka taageera dhinaca dimuqraadiyadaynta iyo nabadgelyada intii hogaaminta talada Somaliland uu la wareegay Madaxwayne Axmed Silanyo oo ay rejo wayn ka qabeen hogaamintiisa waayo wuxu ahaa nin muddo dheer ku soo jiray siyaasadda soomaalida oo wax ku bartay kuna noolaa dalka Ingiriiska dhaqanka reer galbeedkana si fiican u yaqaan oo aanay ka shakisnayn in uu noqdo shakhsi aanay is fahmi karaan. Laakiin markii uu ku guulaystay doorashada waxay markiiba sua’aal saareen xukuumadii uu soo dhisay. Waxa u raacay oo ay la socdeen dagaalkii ay xukuumadiisu ku qaaday saxaafadda madaxa banana iyo xoriyadda hadalka iyo weliba xadgudub yada dhinaca xuquuqaha aadmiga. Waxa intaa dheeraa oo ay la socdeen heerka uu gaadhay musuqmaasuqu iyo doorashooyinkii xorta iyo xalaasha ahaa ee lagu yaqaanay Somaliland oo xukuumadda Axmed Silanyo ay ku kala tagtay iyadoo doorashadii golayaasha degaanadu oo ahayd tii ugu horeysay ee dhiig ku daato, ay markhaati ugu filan tahay.
Arimahaas oo dhan ayaa ahaa arimaha ay qaadhaan bixiyayaasha Somaliland daneeyaa ay si joogto ah uga la hadli jireen iyadoo Jawaabta madaxwanaha la odhan karo waxay ahayd HABLU WALAA TAHABLU ama OGOL DIIDAN, oo marka ay is hor joogana waxba kama diido balamana way ku kala tagaan hadana bal amuurta Ilaahay intii isaga ku xeernayd iyagu tooda waxoodii xilka lahaa ayuun bay iska sii wataan isguna jooga ma yidhaa. Xataa uma kuur galo gol daloolooyinka lagu dhaliilayo maamulkiisa iyo dulmiga iyo cadaalad darrada joogtada ah ee laga tirsado inta isaga ugu dhaw dhaw, Tusaale ahaan Xayiraada labada wargeys ee HUBAAL iyo HAATUF iyo xadhiga sharci darrada ah ee suxufiyiinta ayaan la qiyaasi Karin inta ay yeeshay siyaasadda arimaha dibadda ee Somaliland.
Hadaba, saamayn intee le’g bay Madaxwayne Silanyo ku yeelan karta quusta ay bulshada caalamku ka joogto xukuumadiisa iyo qaadhaan bixiyayaashii danayn jiray Somaliland ee hadda indhaha ka jeediyay ee u jeedsaday dhinaca Somalia isaga iyo xukuumadiisana dhabarka u saaray dibu dhaca ama fashilka ku yimi doorashad ku qabsoomi karaysay xiligii loogu talogalay hadii uu madaxwaynuhu inta ugu yare e dadaal ah samayn lahaa?.
Hadii jawaabtu ku xidhan tahay go’aan ama warbinta uu ka sugayo gudida todobada wasiirada lagu sheegay way adag tahay in natiijadu xal rasmi ah noqon karto waayo waxa uu madaxwanuhu wasiiradiisa u diray in ay keenaan jawaab qancin karta qaadhaan bixiyayaasha qoraalka lahjadda adag soo gaadhsiiyay isaga laftiisa iyo weliba mucaaridka halkii ugu fogayd gaadhay markii ay gar iyo garwsho midna waayeen. Waayo wasiiradu marka horeba waxay qayb ka yihiin dhibaatada ee xalka qayb kama aha oo waa halkii AHN Gaariye sheegay.
NIN DAWEE LA LEEYAHAY
DEMBI UU BADH LEEYAHAY
HAARAANTA DOOGTA LEH
INU DAARO MA OGOLA
