..Waxaan usoo joogay habeen ayaa waxa laga xaday Combuuterkisii, hard disk iyo qoraalo badan oo mihiim ahaa oo ugu jiray shandada mudo ayaanu ka warwersanayn qoraalada iyo faylasha ugu jiray, laba ilaa saddex cisho ka dib ayaa waxa na soo qaraacay tellfoon leh waxa la iga iibiyey combuuterkaagii oo ay qolo iga iibisay, markaa waxaan gartay inaad adigu leedahay, sidaa awgeed miyaad ii celinaysaa lacagtii aan kuu keeno alaabadaadiiye…. haa buu ku yidhi. Ninkii ayaa kusoo celiyey oo yidhi waayahaye soo dir lacatii kuna soo dir tellefoonkaas …allabtaadiina inagoo aan is arag ayaan meel kuu dhigayaa waad ka qaadan doontaa ma doonaayo inaynu is aragnee……… waayey ayuu ku yidhi.
Lacagtii aniga ayuu ii soo diray waxaan anna u diray teleefoon uu noo soo sheegay, ninkii… galinkii danbe…ayaanu is raacanay waxa uu nagula ballamay maqaaxi suuqa Hargeysa dhexdeeda ah oo u dhaw shirkadda Telesom oo la yidhaa Cadaani,,, intaanu sii soconay ayaan ku idhi Maxamed saldhiga ina gee Telefoonka lanbarkiisa hadii aynu u gayno Telesom waa la soo qabane ,, maya ayuu yidhi waynu aaminaynaa sidaa aynu ku heshiinay ayeynu ku soconaynaa , sidii ayaanu meeshii ku tagnay kana soo qaadnay cambuuterkii oo qudha, waanu la hadalay ninkii waxa uu ku yidhi walaal waxa iga maqan hard disk iyo alaabo kale, waan keenayaa ayuu ku yidhi … tiina waa uu keenay oo meel kale ayuu nagula balamay sidii baannu labaadayadii maalintii ku xigtay uga soo qaadnay . Waa markaan dareemay daacadnimada xeesha dheer ee marxuum Maxamed-rashiid.
Sidaas oo ay tahay waxa jira abwaano badan oo gabayo baroor-diiq ah ka tiriyey geeridii marxuum Maxamed-rashiid oo uu ka mid ahaa Abwaan/saxafi Axmed Cismaan Batuun oo ka tiriyey maanso baroor-diiq ah oo ay tuducyo kamidi ahaayeen:
“Haldoor-baa xaqii helay
Dadka ururin jirayoo
Daacadnimada hadalkiyo
Dalka horumarkiisiyo
Deeqsinimo ku caan baxay”
Dulqaad:Waxa aad loogu yaqaanay marxuumka inuu wax kasta oo ku yimaada ku xalin jiray dul qaad iyo cafis badan kuna guulaysan jiray marka danbe. Marxuum M.rashiid waxa uu in badan qaadan jiray dulqaadna u yeelan jiray wax yaabaha kaga yimaadda asxaabtiisa iyo dadka ay shaqo ka dhaxayso isaga oo ahaa geed ay isugu yimaadaan dhamaan saxafiyiinta Somaliand oo aan kala gudobsan jirin dhamaantood.
Deeq iyo dirir: bakhaylku maaha ka kaa lexejecleeya markaad aduun u baahantay oo kaliya, laakiin waa ninka aan kugu kaalin hadal aad u baahantay ama garab istaag maalmaha adag ee ku soo mara.
Haddaba waxa Iyana aan la ilaabi Karin sidii aanu dadka ugala bakhayli jirin waxa gacantiisa ku jira oo hadii uu isagu aanu markaa gacanta ku hayn waa uu u baadi dooni jiray, waayo waxa la yidhi ninka jeebkiisa wax kaasiiya nin dheh, ka jeeb ninkale wax kasiiyana niman yaal dheh M.rashiid nimanyaal ayuu ahaa.
Dirirta iyo geesinimadu waa astaamaha ragga ee waaweyn hadii ninku uu ka dhiidhiyi waayo waxa xun, dulmiga iyo dulaysiga raganimadiisa waxbaa ka dhiman.
Marxuumkan ilaahay waxa uu ku manaystay geesinimo uu ugu hiilin jiray xaqa kuna garab istaagi jiray maalinba ka laga gardaran yahay ee la muquuninayo. Waxa aynu usoo joognay intaas oo arrin oo laga maagay oo inta uu fikirkiisa ka badheedhay uu xaqa ku adimay.
Waxa uu u dagaalami jiray waxa ay ahayd hal hadaf oo ahaa in saxaafadda Somaliland ay noqoto meel ka xor ah dulmi, qabiil, biidhi qaadte, iyo nin jeclaysi oo danyaraha quudisa, xaqiisana u soo ridda, kana hadasha masaakiinta miskahooda la fuulayo.
Waa in yar oo qalays ah oo aan idiinka soo dheegay maanso ay ugu baroordiiqday Nimco Aadam Hurre (Nimco gabaydo) oo isgoo dheer aynu kaga Bogan doono qormadan gaaban.
Gurmad nin u ahaan jiray
Birma gaydadiisiyo
Mahuraanka gaabshoo
Qofka dhibi ay gaadhaba
U gargaari jiray iyo
Maanta geesi baa baxay
Garabkayga taagnaa……..
Ildheeri: in qofku uu yeesho indho ku yaal qalbiga oo lagu arko waxyaalaha soo socda oo laga sii hortagaa waa astaamaha dadka garaadkoodu sareeyo ee loo yaqaan indheer-garad oo waata Somalidu tidhaa niman waxa soo socda garani waxa jooga ma garto.
Taasna waa mid qof kastoo M.rashid yaqaanay ku suurayn jiray oo uu ula tagi jiray falanqaynta arimaha bulshad siyaasada iwm.Sida aya ugu makhaati kacday Nimco-Gabydo maansadeeda ku sheegtay indheer-garadnimadiisii maansadaas oo ay ka mid ahaayeen tuducyadani
”Allaylehe nin gob ah iyo
Halyay garasho dheer iyo
Muumin ruuxa gool-moon
U gargaari jirayoo
Ka weynaa gankiisiyo
Maanta Geesibaa baxay”
Go’aan qaadasho: waxa uu ahaa nin dadka la tashada oo aan kaligii maroorsan talada iyo go’aanka jeclaana inuu dadka fikirkooda dhagaysto haduu sax yayna qaadto. Waxa dhaci jirtay muddo aan la shaqeey Maxamed-rashiid inuu fikirka balaadhin jiray inta ay talo wadaagaana wax ka siin jiray, marka firkirka laysu geeyana qaadan jiray go’aan aan laalaabad lahayn.
Go’aankaasna aad ugu imaynayso haduu kula joogo iyo haduu kaa maqanyey labadaba. La soco cadadka danbe
Hussein Abdi Awil (Foodcadde)
Tell:063-4440165
Email: food44401@gmail.com
