“Innaalillaahi wa innaa ilayhi raajicuun”
Allaah ha u naxariistee, waxa ku geeriyooday magaalada Hargeysa fannaankii weynaa ee Maxamed Axmed Kuluc oo ka mid ahaa asaasayaashii, lafdhabartii iyo bud-dhigayaashii fanka iyo masrixiyadda Soomaaliyeed.”
Waxa uu ku dhashay agagaarka tuulada “Raydab-Khaatumo” oo dhacda hawdka galbeed ee gobolka Togdheer. Kuluc waxa uu ku barbaaray magaalada Burco, halkaas ayaanu seeskiisa waxbarasho ku qaatay.
“Hargeysa ayaan tegay, waxa aan ku degay niman aannu is niqiinnay, waxa I helay ninka la yidhaahdo Ismaaciil Shiikh Axmed “Cagaf” waxa uu igu yidhi ‘ina keen’ wuu i kaxeeyey waxa uu ii geeyey Cabdillaahi Qarshe oo aan Idaacadda ka dhegaysan jiray oo jeclaa, Cumar Dhuulle iyo koox la fadhida, cabbaar markaan joogay ayay igu yidhaahdeen ‘bal hees’. Waa lay garaacay qalabkii, heestii aan maalintaas qaaday waxa ay ahayd hees Balwo ahayd. Markaan dhammeeyey aniga oo aan wax khalada ah gelin oo sideedii u qaaday heestii, ayuu Cabdillaahi Qarshe igu yidhi ‘xaggaad ka heesi jirtay’ meelahaas dhallinyaradu isugu timaaddo, ayaan ugu jawaabay, haddana waxa uu igu yidhi ‘weligaa kan ma ku heestay’ intuu Kabankii sare u qaaday, waxa aan idhi maya. Dabeed Ismaaciil ayuu ku yidhi ‘waar ninkan haynaga sii daynnin, sidii ayaan Fanka ugu jiray” sidaas waxa yidhi Allaah ha u naxariistee Maxamed Axmed Kuluc.
Fannaankan Kuluc, waxa lagu naanaysi jiray Boqorka Masraxa, waxa uu ahaa fannaanka marka uu heesaha uu ku luuqaynayo ku xarragoon jiray, codkiisuna uu dhegaha ummadda Soomaaliyeed raaxo galin jiray, marka uu masraxa taagan yahayna bulshada qiiro galin jiray.
Waxa uu ahaa Kuluc hoobalka keliya ee ay higsan jireen inta ugu badan Fannaaniinta Soomaaliyeed ee ragga ahi, fannaaniinta ugu badan ee dumarka ahina ay jeclaayeen in ay la heesaan.
Fanka Kuluc waxa uu ku suntan yahay taariikhda fanka bilow ilaa dhammaad. Waxa uu ku soo heesay midhihii Balwada, Heellada, Qaraamka, iyo Naaxiyadaha Raaxeeyaha ee kala duwan oo dhan: Beerdillaacshe, Aroor, Laac, Rogaal, Subcis, Xaafuun, Iskushuban, Burcaawi, Liillalow, iyo inta badan ee kaleba.
Waxa uu ahaa hoobal laga jecelyahay dhammaan Geyiga Soomaaliyeed oo dhan, waxa uu soo matalay Riwaayado badan oo ay ka mid ahaayeen xusuustayda: “Sidan maysku qabnnaa mise waan qasannaa”, “Indho sarcaad,” “Hammi guur ama guueso,” “Dhoof caashaq,” “Cilmi iyo caado,” iyo qaar kale oo badan oo kuwaas ka horreeyey, kana danbeeyey. Waxa Riwayaadaha uu Kuluc inta badan ka ahaan jiray arbaha ama jilaha (Actor) ka koowaad.
Maxamed Axmed Kuluc waxa uu ka mid ahaa rukummadii uu ku taagnnaa muddadaa lixdanka sannadood ah fanku, waxa uu ka soo bilaabay fankiisa koox soomaaliyeed oo fannaaniin ah tii ugu horraysay “Walaalaha Hargeysa”. Sidoo kale, waxa uu ka mid ahaa koox-faneeddii layaabka lahayd ee “Waaberi”.
Riwaayadaha iyo heesaha uu wakhtigaa dheer soo jilay ama soo qaaday, Abwaanniinta midhahooda lahaa inta bandan waxa ka mid ahaa: Ismaaciil Cagaf, Cali Sugulle, Maxamed Cali Kaariye, Saxardiid Jabiye, Xuseen Aw Faarax, Xasan Shiikh Muumin, Axmed Saleebeen Bidde, Basbaas, Cabdi Iidaan Faarax, Xasan Ganey, Maxamed Cumar Huryo, Cabdi Qays, Cismaan Askari, Dacar, Tukaale iyo in badan oo aanan wada xusin.
Waxa uu ahaa tiir adag oo hormuud u ahaa garddaadintii fanka Soomaaliyeed, waxa uu la heesay fannaaniin faro badan oo dumar ah, waxa ka mid ahaa: Saado Cali, Magool, Baxsan, Hibo Nuura, Sahra Axmed, Maandeeq, Qamar Harawo, Shankarroon, Aamina Cabdillaahi, Kinsi Xaaji Aadan, Caasha Cabdow iyo qaar kale.
Heesaha uu Kuluc lahaa ama ku luuqeeyey, waxa ay lahayeen xornnimodoon, waddani, jacayl, waano, hogatus, hawaale warran, arrimo bulsho iyo nooc kasta oo ka turjuma hummaagyada iyo dareenada ay soomaalidu wax ka curiyaan, waxa ay lahaayeen bad kasta oo maansada soomaaliyeed ka unkanto.
Allaah ha u naxariisto, qabriga ha u nuuro hoobalka, fannaanka iyo boqorkii masrixiyadda soomaaliyeed oo Sabti 17/01/2015, maanta ku geeriyooday caasimadda Soomaalilaand, Hargeysa. Waxa aan ka tacsiyadaynayaa dhammaan ummadda soomaaliyeed, abwaannadii iyo fannaantii Soomaaliyeed ee uu wakhtiga badan la soo qaatay, qoyskii iyo qaraabadii uu ka dhashay. Waa shakhsi ka baxay dal kasta, magaalo kasta, qoys kasta iyo qof kasta oo Soomaali ku abtirsada oo maanta uumman.
Sakariye Saxardiid Axmed “Awaare”
Email: qaraami1987@hotmail.com
Facebook: Sakariye Saharded Ahmed
Burco, Somaliland
Qalinleyda II © Weedhsan Corporation
