Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland oo ka kooban in ka badan 27 urur bulsho oo ka hawlgala dhamaan gobolada dalka Somaliland, waxay si wadajir ah oo niyad sami ah ku soo dhawaynayaa Heshiiska Taariikhiga ah ee ku kala saxeexdeen Magaalada Jabuuti ee dalka Jamhuuriyada Jabuuti 21/12/2014 labada Madaxwayne ee Somaliland iyo Somalia, Madaxwaynaha Jamhuuriyada Somaliland Mudane H.E. Axmed Maxamed Maxamuud ‘Siilaanyo’ Madaxwaynaha Xukuumada Federaalka Soomaaliya Xasan Sheekh Maxamuud.
Ururada bulshada rayidka ah ee bayaankan taageeray waxay u arkaan Heshiiskan uu Jabuuti oo uu Madaxwayne Siilaanyo la saxeexday dhigiisa Soomaaliya Madaxwayne Xasan Sheekh, mid lagu sii xoojiyay sharcinimada Wadahadalada Beesha Caalamku dabada ka riixayso ee u socda Somaliland iyo Somalia, iyadoo taariikhda markii ugu horaysay uu heshiiskan uu la saxeexday Madaxwayne Rasmi ah oo aan kumeel-gaadh ahayn oo uu yeeshay dalka Somalia.
Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland waxay u arkaan guul uu u soo hooyay Madaxwayne Siilaanyo shacbigiisa iyo dalkiisa xaqa ay shacbiga Somalialnd iyo Dalkiisu ku leeyihiin Kaalmada Dhaqaale ee caalamku ugu deeqdo labadii wadan ee ka hor 1991 la isku oran jiray Jamhuuriyda Dimuquraadiga Soomaaliya.
Marka lagu daro sii adkaynta qodobka Maamulka Hawada Soomaaliya ka hadlaya waxa ay Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland u arkaan heshiis si waadax ah ugu gogol xaaraya Aqoonsi buuxda oo dunida uu ka helo Dalka Somaliland
Sidoo kale, Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland waxay si buuxda u taageersan yihiin Siyaasada Madaxwaynaha Somaliland Mudane Siilaanyo uu kaga saaray go’doonkii Caalamiga ahaa ee qadiyada aayo ka tashiga iyo madaxbanaanida dalka Somaliland uu ku jiray in ka badan 20 kii sanadood ee u danbeeyay.
Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland waxay ku diirsadeen Mawqifka aan Mugdigu ku jirin oo Gudoomiyaha Xisbiga Siyaasiadeed ee Cadaalada iyo Horumarka UCID Mudane Faysal Cali Waraabe uu ku bayaamiyay sida Xisbiga UCID u arko heshiiska labada dal ee Somaliland iyo Somalia ku kala saxeexdeen dalka Jabuuti 21/12/2014 dhawaaqa shalay
Gudoomiyaha Xisbiga UCID waxa uu shacbiga Somaliland u muujiyay bisaylka siyaasadeed iyo Lexejeclada Wadaninimo ee Hogaamiayaha Xisbiga UCID uu leeyahay.
Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland waxay u arkaan mid werwerkeeda leh qaabka ka aradan ARAGTI QARAN oo uu heshiiskan uga hadlay Gudoomiayaha Xisbiga Siyaasadeed ee WADANI isla markaasina ah Gudoomiyaha Aqalka Hoose ee Sharcidajinta Somalialnd Mudane Cabdiraxmaan Maxamed Cabdilaahi ‘Ciro’.
Mudane Ciro waxa uu isku dayay in uu madmadow galiyo qodobo ka mid ah heshiiska oo aan haboyaraatee aan mugdi gali karin iyadoo hadalka uu warbaahinta caalamiga ah siiayay shalay gudoomiyaha Xisbiga WADANI laga dareemayay in ay isaga agtiisa ku wayntahay loolankan siyaasada dalka ee u dhexeeya seddexda xisbi Qaran, iyadoo Taasi Badelkeeda hadalka Gudoomiye Ciro laga dhadhansan karayay in aanay isaga iyo xisbigiisa miisaan cuslus uba lahayn arimaha ay ahayd in ay ka midaysnaadaan Hay’adaha Dastuuriga ah ee dalka iyo Asxaabta siysaasadeed Qaranimda dalka.
Difaacayaasha Madaxabanaan ee Xuquuqda Aadamiga iyo Dhaqdhaqaaqyada Dimuquraadiyada Doonka Somaliland waxay bogaadin iyo mahadnaq farobdan u dirayaan Madaxwaynaha Jamhuuriayda Jabuuti Mudane Ismail Omar Gealeh oo isagu dalkiisa ku martigaliayay Wadahadalada u dhexeeyay labada wafti ee ay kala hogaaminayeen labada Madaxwayne ee Somalia iyo Somaliland.
Afhayeenka Suleiman Ismail Bolaleh.
Difaacayaasha Madaxabanaan ee Xuquuqda Aadamiga
iyo Dhaqdhaqaaqyada Dimuquraadiyada Doonka Somaliland