Paris, France, December 9, 2014 (Codka Hargeysa) – Wakiilka Somaliland u jooga dalka Faransiiska Ambassador Cali Ismaaciil Xasan, ayaa dhowaan magaalada Paris ee caasimadda dalka Faransiiska kaga qayb-galay Kulan caalami ah oo lagu soo bandhigay Buug laga qoray Waddamada aan dunida sida rasmiga ah looga aqoonsan madaxbanaanidooda, halkaas oo uu Safiirka Somaliland ee dalka Faransiisku uu ka jeediyay khudbad uu kaga waramay horumarka iyo dimuqraadiyadda ka jirta Somaliland.
Buugga kulankan lagu soo bandhigay oo la yidhaahdo “De Facto States” ama Dalalka Jiritaankooda la qirayo balse aan aqoonsiga dalnimo haysan, ayaa waxa qoray Diblomaasi Maurice Bonnot, oo ahaa diblomaasi hore, isla markaana hore u ahaa Ergayga gaarka ah ee Hay’adda Ammaanka iyo Iskaashiga Yurub ee waddamada ku dhaca xuduuda u dhexaysa Yurub iyo Aasiya ee loo yaqaan gobolka the Caucasus, kaas oo Khamiistii ina dhaaftay lagu soo bandhigay Mac-hadka Dimuqraadiyadda iyo Iskaashiga ee Paris.
Ambassador Cali Ismaaciil ayaa hadalkiisa uu halkaas ka jeediyay waxa la sheegay inuu ku soo bandhigay faa’iidada ay mandaqadda Geeska Afrika u yeelan karto aqoonsi caalami ah oo Beesha Caalamku u fidiso Somaliland, isagoo si gaar ah u xusay in aqoonsiga Caalami ah oo ay hesho Somaliland ay wax weyn ka tari lahayd ammaanka iyo degenaanshaha gobolka, gaar ahaan la-dagaalanka Argagixisada iyo Budhcad Badeeda.
Waxa kale oo iyaguna kulankaas ka hadlay wakiilada Jamhuuriyadda Nagorno Karabakh, Falastiin iyo weliba Xildhibaan ka socday dalka aan la aqoonsan ee Transdniestria.
Wakiilka dalka Faransiiska u jooga Jamhuuriyadda Nagorno Karabakh, oo la yidhaahdo Hovhannes Gevorgyan, ayaa isna halkaas ka soo jeediyay khudbad uu kaga warama jidka ay u soo mareen dhismaha dalkooda, iyo sida aqoonsi uu dalkiisu beesha Caalamka ka helo ay wax uga tari lahayd degenaanshaha iyo xasiloonida dalkiisa.
Qoraaga Buuggan iyo Wakiilada dalalkan ay Somaliland ka mid tahay ee aan Beesha Caalamku aqoonsan, ayaa halkaas kaga jawaabay su’aalo ay weydiiyeen Suxufiyiin iyo aqoonyahano kulankaas ka qayb-galay.
XIGASHO: WARGEYSKA SAXAFI