Qaliliinki: Mustafe Sh. Cumar
Macalinka dugsigu qiimo gaar ah ayuu inoo leeyahay doorkiisa bulshadda awgeed. Sidaas darteed, in dhaliil lagu soo qaado uma quudhno, Macalinka aynu ka hadlaynaana kaas maaha, e, waa hoggaamiyaha umada ama dhaqan haku noqdo madax ama siyaasade. Haaheey, waa macalin ninka umada horjoogga u ah ee ay ku dayataa. Haddii uu kugu horgalo dedaal iyo waxqabad oo uu hawl-kasta kaaga horeeyo waad ku qasbantahay inaad daba socoto, hadduu colaad iyo nacayb kuu hor ordo sidoo kale, haddii uu Qabyaalada ku kala barana waa la mid. Miyaan la odhan “Awrka danbe awrka hore socodkiisuu leeyahay.”
Marka ay sidaas tahay, Miyaanay madax wareer noqonayn marka hoggaamiyahaagu wixii uu kuugu madaxda iyo macalinkaba ahaa kugu xidho ee uu la yaabo sababta aad ugaga dayatay.?
Waxaa qallinku uga socdaa Qormadan oo ku keenay su’aal la iska weydiiyay sababta keentay xadhiga afar dhalinyaro ah oo u badan madaxdii urur la baxay Jiidali.
Todobaad ka hor guddoomiyahii Jiidali Cabdiraxmaan Jaamac Xassan ayaa Xabsiga loo taxaabay, habeen horena saddex kale ayaa xabsiga la dhigay, kuwaas oo kala ah Faysal Cumar Madar oo ururkan af-hayeen u ahaa, Cabdiraxmaan Badal oo aan isagu wax xil ah ka hayn iyo xoghayihii ururkan Cabdikariin Maxamed Cumar.
Xubnahan midkoodna xukuumadda iyo ciidamada amaanku kama hadal sababta loo xidhxidhay. Lagumana hayn sidda la tilmaamay faldanbiyeedyo iyo rabshado ay ku kaceen ama ka danbeeyeenba. Balse, waxaa kali ah ee loo maleeyay in lagu qabsaday waa arrimo siyaasi ah iyo inay ka tirsan-yihiin amaba abaabuleen urur beelaysan oo ku abtirsanaya dhalinyaradda beelaha Subeer Awal oo la baxay Jiidali iyo inay xukuumadda arragti ahaan dhaliileen. Halkan ayaa su’aashu ka imanaysaa, ma danbi baa in beelnimo la isu abaabulaa oo xukuumadda jirta lagu dhaliilaa? Haddii ay danbi tahay maxaa odayaasheena dhaqanka, madaxdeena siyaaasadda oo uu ku jiro Xataa Madaxweynuhu ay danbi ugu noqon weyday marka ay danaha siyaasadeed ka leeyihiin ee shirarka beelaysan haddana siyaasadeed waddaan.? Dhalinyaraddani ma iyaggaa bilaabay qabyaaladda foosha xun leh iyo shir beeleedyadda mise waa ay tiro dhaafeen? Haddii ayba qaabkaas hoggaamiyayaashoodda kaga daydeen oo u qaateen nidaamkan abaabulka beelaha Jidka kali ah ee loo marro ama lagu gaadho Madaxtooyadda Maxaa lagu haystaa?
Ma maxaad noola fahamtay baa…Faallada dheerayn mayno waxaa aynu leenahay Macalinka ardaydaada aflaxday sii daa oo ha cabudhinin, haddii aad danbi ku haysana maxkamadda keen hala arkee. Waxaa la yidhi aqoon xumo ama qorshe xummo abaar ka daran, Xukuumadda lafteedda ayayna ceeb ku tahay in maalin kasta dhalinyaro aan la haynin wax ay gaysteen xabsiga loo dhigo arrimo siyaasadeed. Iyaddoo Boolisku dhagaha ka furaystay ama uu ku guuldaraystay inuu wax ka qabto Qowlaysatada kooxaha ah ee Magaalooyinka Somaliland oo dhan shacbigu qaatiga ka jooggo. ““Arin nin la toosan ayaa nin kale tuur la leh.”