BOSTON (CH)- Mulkiilaha shirkadda samaysa barnaamijyada Kombuyuutarrada Microsoft, ahna maal-qabeenka ugu taajirsan adduunka, Bill Gates, ayaa shirkadda Isgaadhsiinta ee Telesom ku ammaanay adeeggeeda lacagaha laysugu xawilo ee Zaad iyo sida ay Somaliland ugu horseedday inay ka mid noqoto waddamada ugu horreeyey ee adeeggan laga hirgeliyo.
Bill Gates oo khubad ka jeediyey Shirka SIBOS ee sannadkan oo 2-dii bishan lagu qabtay magaalada Boston ee dalka Maraykanka, kaas oo laga hadlayey Baananka Caalamiga ah iyo Xawliga ay ku socdaan lacagta Elekatarooniga ah ee mobaylada la iskugu xawli oo ay soo qaban qaabiso hay’adda SWIFT, waxa uu si qoto-dheer uga hadlay nidaamka lacagaha laysugu xawilo Telefoonada gacanta, waxaanu si gaar ah u soo qaatay sida shirkadda Telesom Somaliland uga hirgalisay Adeega ZAAD.
Bill Gate oo khudbaddiisa si faahfaahsan uga hadlay Shirkaddaha Isgaadhsiinta ee ka shaqeeya adeega lacag-diridda ee loo adeegsado telefoonnada gacanta, waxa uu tusaale u soo qaatay laba shirkadood oo laga hirgaliyey Bangaladesh kuwaasi oo uu sheegay inay dhowr sano ka hor go’aansadeen in ay dalkaasi ka hirgaliyaan adeega Xawilaada Lacagta Mobaylada, waddankaas oo uu sheegay inay dad tiro yari dad aad u yari leeyihiin xisaabaadka Bangiyadda, balse dadka intooda badani ay keydinta iyo xawilaadda lacagaha u isticmaalaan mobayladooda.
Waddanka Bangladesh oo ah dalka afraad ee ay ku nool yihiin tirada ugu badan ee Muslimiinta adduunka, ayaa adeeggan laga hirgeliyey sannadkii 2011-kii, waxaana wakhtigan isticmaala 13 milyan, waxaanu Bill Gates oo ka warramayey sida uu adeeggani uga hirgeliyey dalkaas, sheegay in adeeggani qayb muhiim ah ka geysto miisaaniyadda dalka Bangladesh oo boqolkiiba 10 uu ka yahay, iyada oo bil walba in ka badan 1 bilyan oo Dollar uu ka dhaco lacagaha la iskugu diro mobaylka.
Bill Gate waxa uu tusaalaha labaad u soo qaatay Shirkadda Telesom sida ay uga hirgalisya dalka adeega ZAAD, waxaanu qubadaddiisa ku soo qaatay dedaalkii shirkaddu u gushay inay bulshada fahansiiso adeegsigiisa, isaga oo sheegay in muddo saddex sanno ah dadka laga dhaadhicinayey sidii ay u aqbali lahayeen isticmaalka adeega Lacag diridda Mobaylka (ZAAD), waxaana uu ka sheegay guulaha laga gaadhay in adeeggani hirgalo in dadka magaalada joogaa uu lacag u diri karo qof kale oo miyiga jooga.
Bill Gate isagoo ka hadlaya sida shirkadda Telesom uga hirgalisay Somaliland adeega Lacag Dirid ayaa yidhi, “Waxaan la yaabay in aan arko meel sida Somaliland lacagta meesha ka baxdo waxaan taasi keenay in dadku ay akoonwanadoda Electaroonig ah bishiiba ku shubtaan lacagahooda. Shirkadda Iskaadhsiinta mobaylka Telesom Somaliland, dadku waxay aad u isticmaalaan lacagta mobayilada la iskugu diro. Celcelis ahaan lacagta lagu diro mobayladu waxa ay ka badan tahay lacagta dadku isku diraan,” ayuu yidhi Bill Gates.
“Khudbadan Maalqabeenka Dunida Ugu lacagta badan Adduunka ee Bill Gate u tusaalaha ugu soo qaaday adeega ZAAD ee shirkadda Telesom ka hirgalisay Somaliland, ayaa uu sumcad iyo sharaf u soo hooyatay dhammaan bulshada Reer Somaliland, waxaanay midhadhal u tahay mabaadiida iyo iskaashiga shirkadda Telesom aasaaseen,” sidaas waxa lagu sheegay qoraal ka soo baxay Shirkadda Telesom.
Shirka Telesom oo ah shirkadda ay wadda leeyihiin in kabadan 1500 oo Saamilay ah oo ku nool dhamaan dhulka Somaliland iyo Waddamada dibadda, waxay door ka qaadatay kobcinta dhaqaalaha iyo horumarka dalka.
CODKAHARGEYSA.COM
INFO@CODKAHARGEYSA.COM