Borama, Somaliland, October 21, 2014, (Codka Hargeysa) – Qaar ka mid ah waalidiinta ardyda Jaamacadda Cammuud ayaa walaac ka muujiyay wakhtiyada ubadkoodu tegeyaan goobaha waxbarashada iyo jaha-wareerka goobaha waxbarashada oo maalinba meel loo rarayo.
Sidda uu ku soo waramay Wariyaha Saxafi ee Gobolka Awdal Maxamed Cumar, waalidiintan ardayda Jaamacadda qaarkood oo ka hadlay waxyaalaha ay kaga cabanayaan saacadaha kala duwan iyo goobaha kala duwan ee ardaydu tegeyaan jaamacadda ayaa walaacooda ku saleeyay dhawr arrimood oo ay ugu horreyso wakhtiyada dambe ee gaar ahaan gabdhaha dhallinyarada ahi tegeyaan fasalada taasoo ay sheegeen in qaarkood fasalada laga soo daayo ilaa tobanka caweysinnimo wakhtigaas oo suuqyada magaalada Boorama ay albaabada ka soo xidheen qabowga soo kordhaya, waxayna sheegeen in gabdhahaasi halis ugu jiraan tuugta, wiilasha dhallinyarada ah iyo dadka kaleee maskaxda wax uga dhimanyihiin ee gaafwareegaya suuqyada iyo xaafadaha cidhiidhiga ah, loona baahnaa inay maalinnimada ama inta aanay qorraxdu dhicin waxbarashadooda soo dhammaystaan.
Sidoo kale ayaa waalidiintani sheegeen in ardayda ku jirta jaamacaddu aanay lahayn goob gaar ah oo ay ugu hagaagaan waxbarashadooda isla markaana kolba goob loo sheego inay tegaan kuna jaahwareeraan.
Waxa kale oo ay walaac ka muujiyeen wakhtiga salaadda subax horteed oo ardayda qaarkood laga kiciyo hurdada si ay u tagaan fasaladda, taasina ay hurdo yaraan ku ridday ardayda qaarkood oo habeenkii aan hore u seexan, kuna soo jeeda daawshada ciyaaraha, waxayna waalidiintani soo jeediyeen in wax laga beddelo jadwalka caynkaas ah ardaydana loo qoondeeyo goobo joogto ah oo ay ugu hagaagaan fasalada, iyagoo waalidiintani duruufaha ka haysta waxbarashada Jaamacadda ku nisbeeyey tixgelin gaar ah oo la siinayo macallimiinta oo laga yaabo inay qaarkoodna haystaan shaqooyin kala duwan, wakhtiyada munaasibka ahna aanay haleelaynin wax baridda ardayda Jaamacadda .