“Dameer Kasta 50,000 SL oo ganaax ah ayaa laga qaaday dadkii lahaa…waxana la xidhay dadkii diiday.” Cabasho
“Dameeraha iyo Xoolaha oo dhanba waxaanu isla garanay…” Gudoomiyaha Deg. Dhoqoshay
Hargeysa (Codka Hargeysa) – Guddoomiyaha Degmada Dhoqoshay Maxamuud Cabdi Saleebaan (Doob)ayaa jawaab ka bixiyay eeddo loogu Jeediyay Inuu afartameeyo Dameer sifo sharci darro ah u xidhxidhay, islamarkaana dadkii lahaa ku qasbay inay ganaax ka bixiyaan.
Eeda marka hore la jeediyay
Waxaa Warbaahinta shalay la soo gaadhsiiyay qoraal arrintan Dameeraha lagaga cabanayo oo u dhignayd sidan : “Malintii sabtida ee tariikhdu ahayd 11/10/2014 ayaa gudoomiyaha degmada Dhoqoshay Maxamuud Cabdi Saleebaan (Doob) Raafay Dameerihii magaalada iyo kuwii reer miyiga ee xorfada ka cabayay oo uu xidh-xidhay. Markii uu jeelka u taxaabay Dameerihii ayaa dadkii lahaa Saldhiga yimaadeen, gudoomiyaha ayaa dadkii u qudbadeeyay oo yidhi Dameeruhu sharcigii bay jabiyeen oo waa maxaabiis, waxaana la su’aalay sharcigiisu muxuu ahaa Dameeruhu danbiga ku galeen.
Gudoomiyuhu waxaa ugu jawaabay Dameeraha Tuulada waan ka mabnuucay inay soo galaan maanta laga bilaabo waxaanan ganaaxay 50,000 oo Somaliland Shiling ah Dameerkiiba markii la diidayna cuqashii buu xidhxidhay. Dadweynihii baa gadooday oo qas abuuray dabadeed cuqashii ayaa aragtay in amanigii gacanta ka baxay waxayna goosteen inay bixiyaan si nabada loo ilaaliyo waxay bixiyeen 37 Dameer oo midkiiba lagu ganaaxay 50,000 oo Somaliland Shilin ah.” Ninka Qoraalkan na soo gaadhsiiyay waxaa uu ku dooday in aanu jirin sharci Dameeruhu jabiyeen iyo sabab loo xidho maadaama ay Caasimadda Hargeysa Lodu Xaabto.
Jawaabta Guddoomiyaha Dhoqoshay
Guddoomiyaha Degmadda Dhoqoshay ayaa Wargeyska Saxafi xalay la xidhiidhay si uu cabashaddan wax uga weydiiyo, waxana uu ku dooday in talaabaddan ay qaadeen ka dhalatay heshiis dadweynaha iyo odayaasha deegaanku gaadheen oo la xidhiidha nadaamadda Magaalada sidii loo ilaalin lahaa maadaama waqtigan lagu jiro xilli roobaad. “Waxaa lagu jiraa Xili roobaad, si aanu uga hortagno nadaafad xummo iyo cuduro ka dilaaca meelaha Biyuhu fadhiistaan waxaanu soo rognay amar ku waajahan nadaafadda oo aanu isla qaadanay anaga iyo dadweynuhu. Waxaa ka mid ah in dadku Xoolahoodda Xaraystaan oo aanay habeenkii magaaladda kaga tagin, in aan Bacaha yaryar lagu iibin magaalada maadaama ay dhibaato ku yihiin deegaanka iyo xoolahaba iyo arrimo kale.” Sidaas ayuu yidhi guddoomiyaha Dhoqoshay, waxaana uu intaas ku daray in tusaale ahaan ay Dameeraha u qabteen muddo todoba cisho gudahood ah. “Dameeraha muddo todoba cisho ah ayaanu u qabanay in magaaladda lagaga kaxaysto oo aan habeenkii lagaga taggin. Ciddii amarkaas fullin weydana waa lagu ganaxaaya ayaanu Nidhi. Xerro ayaanu uga sameynay Saldhiga Boliska Agtiisa, Dameerihii waa lagu ururiyay wixii magaaladda laga xarayn waayay. Arroortii ayaa nin ku soo weeraray Ciidankii annigu ma joogin, Boolisku ninkan oo Hubaysnaa waa ay qabteen oo waa xidheen, Galabtiina markii odayaashii yimaadeen waa la sii daayay…dhibaato ka taaganina hadda ma jirto. habeenkii wixii la qabto arroortii ayaa dadku u yimaadaan oo ay kaxaystaan.”ayuu yidhi.
Waxaana aanu weydiinay Xaddiga Dameeraha ay ilaa hadda Ganaaxeen, waxaana uu yidhi. “Horta Dameeraha uun maaha’e waa Xoolaha oo dhan in Habeenkii la xareeyo. Arroortii dadku gaadiid kaleba ma haystaan oo waa lagu shaqeystaa. Laakiin, waa habeenkii Dameeraha maanaan wadda ganaaxin oo qaarkood agoomo aan xaraysan Karin iyo haween baa leh.wixii Ciidan la’aan ama awood la’aan ay ka noqotay waanu sii daynay wixii kale ayaanu ganaaxnay.” Ayuu yidhi maana uu sheegin tiradda ay Lacag ka qaadeen in kasta oo cabashadda hore muujisay in 37 Dameer ay ka qaadeen mid kasta 50,000 oo Shilin.