Hargeysa (CH)- Xaflad Meher oo nooceedu ugub ku tahay dalka isla markaana aan hore loo arag, ayaa Jimcihii shalay ku qabsoontay Hotel Imperial ee magaalada Hargeysa.
Shalay oo Jimce ah ayay ahayd markii laysku arkay Xaflad Meher oo ay isku calmadeen Afar lammaane oo lababa ka soo jeedana Hal qoys; Laba wiil oo Walaalo ah Isla mar u geed-fadhiistay laba gabdhood oo walaalo ah.
Arrintan oo aan hore uga dhicin dalka, ayaa maqalkeedu soo jiitay dad badan maadaama oo inta badan Xafladaha Meherka lagu yaqaannay lammaane is-calmaday ama Wiil gabadh u geed-fadhiistay.
Sawir ahaan munaasibaddu waxay lahayd gogol qurux badan, dhaqan iyo hidde loo gogley. Waxa fadhiyey dhinac kasta marka la eego, labeentii bulshada. Waxa loo fadhiistay xaajo aan ugub ahayn, dhinacna Curad ka ah.
Labada Wiil waxa ay garabka Bidix iyo gabadhka Midig ka fadhiisteen Sheekha u meherinayey labada gabdhood, halka waalidiinta laba qoys iyo ehelkooduna goob-joog ka ahaayeen.
Waa caado gobeed iyo sidii la yeeli jiray ee lagu arki jiray wiil gabadh u geed-fadhiistay la siiyey, balse tani waxay kaga duwanayd, waxa mar kaliya Madasha lagu bixiyey labada gabdhood oo walaalo ah oo lagu kala magaacabo Kawsar Maxamed iyo Maryan Maxamed, waxa la siiyey oo u geed-fadhiistay laba wiil oo walaalo ah oo lagu magacaabo Cabdikariim Daa’uud iyo Barkhad Daa’uud.
Cabdikariim Daa’uud waxa uu calmaday oo loo hibeeyey Kawsar Maxamed oo xaaskiisa noqotay, halka Barkhad Daa’uud loo hibeeyey Maryan Maxamed.
Dhacdadan ayaa noqotay mid xiise leh oo hadal-haynteedu ku badatay bulshada intii ka war-heshay. Dadka qaarkood waxay ku sifeeyeen ama ku tilmaameen in da’yartani ibo-furtay bog cusub oo seeska dhismayaasha qoysaska u bilaabmay, halka dadka qaarkood oo la fejacayna kaga dareen-celiyeen inay tahay arrin aanay Soomaalidu dhaqan u lahayn, sidaas awgeedna wax weyn ka beddeli karta xishoodkii iyo xayihii dhaqanka Soomaalida lagu yaqaannay.
CODKAHARGEYSA.COM