Hargeysa (CH)- Xabaalaha Boqol-jire oo ku yaala duleedka Galbeed ee Caasimadda Hargeysa, ayaa qarka u saaran inay gebi ahaanba noqdaan dooxyo biyo-mareen ah, waxaana arrintan qaylo-dhaan ka muujiyey Maayarka Caasimadda Hargeysa Md Cabdiraxmaan Maxamuud Caydiid oo isaga iyo xildhibaanno ka tirsan Golaha Deegaanka Hargeysa ay shalay booqdeen goobta ay xabaaluhu ku yaallaan.
Xabaalaha Boqol-jire oo wakhtigan ay dhismayaasha magaaladu dhaafeen, ayaa ka mid ah xabaalaha ugu qadiimsan ee caasimadda Hargeysa, waxaana wakhigan cabsi laga qabaa inay daadadku qaadaan, ka dib markii ay ku soo faruurmeen laago biyo-mareenno ah oo xilliyada roobka daadad badan ka soo rogmadaan.
Maayirka Hargeysa Cabdiraxmaan Maxamuud Caydiid Soltelko , ayaa sheegay in xabaalaha boqol jiray ay ku jiraan odayaashii magaaladda, isla markaana loo baahan yahay in dooxyadda ku soo rogmaday sidii looga badbaadin lahaa taas oo dhaqaale ka awood badani u baahantahay in biyaha lagaga xidho.
Ugu horeyn xildhibaan Axmed Daahir Axmed oo ahaa xidhiidhiyaha dadka deegaanka iyo maayirka, ayaa sheegay in xabaalahan boqol jire ahaayeen qaar ay ku aasan yihiin odayaashii magaalada Hargeysa aasaasay, isla markaana loo baahan yahay in eheladdii dadkaaasi iyo cidii kale ee wax ka qabanaysay badbaadiyaan xabaalaha.
“Goobtan aynu taaganahay waa degmadda 31 may, waa xabaalihii boqol jira la odhan jiray ama Muuse Ducaale, waxaanu taaganahay Doox u dhexeeya dhulkii iyo xabaalihii, taas oo uu maayirku u yimid sidii aritan wax looga qabto, runti anigoo ah xidhiidhiyihii dadka deegaanka iyo maayirka, waxaanu doonaynaa in dadkeena gaadhsiino baaxadda jirta inta ay leegtahay,” Sidaa waxa yidhi xildhibaan Xildhibaan Axmed Daahir oo ka mid mudaneyaasha golaha deegaanka Hargeysa.
Eng Maxamuud Caalami oo ka mid ah Injineeradda loo xil-saaray hawsha dhismaha, ayaa sharraxay qaabka biyaha looga leexin karo Xabaalaha, waxaanu yidhi, “sida taariikhdda ka helayno waxa jiray moosas waaweyn, biyihii iyagoo xawli ku socda ayey halkan ku soo dhacayaan,markii aanu xaaladan qiimeyno waxaanu isla garanay in loo sameeyo gabi biyaha ka celiya xabaalahan, kaabado iskugu jira sodon mitir, halka biyuhu ka imanayaa loo sameeyo moosas biyaha qabta oo awoodooda yareeya, marka arintaasi waxay u baahanay fulinteeddii oo dadka deegaankuna ka qaybqaataan”.
Oday Maxamed Axmed Xuseen oo ka mid ah odayaasha deegaanka oo halkaas ka hadlay, ayaa yidhi, “Meeshani waxay ahayd beero, laakiin magaaladii ayaa dhinac walba ka marta oo waxay isku bedeshay baloodho oo dadkii dhinac walba ka maray, oo beertiiba toban qoys ayaa dhaxlay, markii wax laga qaban waayeyna biyihii ayaa soo jiidhay, halkan aynu taaganahay ee waalidiintu ku aasan yahay waa in wax laga qabto, anagu waxaanu isku xukunay calaa beer in baloodh loo jaro oo aanu kaga qaybqaadano xabaalaha lagu dhisayo, dad ay waalidiintaasi dhaleen oo dibadda ku maqan oo wax inagala qaban kara way jiraan.”
“Xabaashan Hargeysa ayey ka da’ weyn yihiin oo Hargeysa dadkii dhisay halkan ayey ku aasan yihiin, dadkii dadkan ka hadhay waxaanu u sheegaynaa inay usoo gurmadaan xabaalahan,” Sidaa waxa yidhi Oday Yuusuf oo ka mid ah wax-garadka deegaanka.
Maayirka Hargeysa Md Cabdiraxmaan Maxamuud Caydiid Soltelko oo halkaas ka hadlay, ayaa bulshada caasimadda qaylo dhaan ugu diray inay kaalintooda ka qaataan sidii loo badbaadin lahaa xabaalaha boqol jire, waxaanu yidhi, “Xabaalahan oo la sheegay inay ka da’weyn yihin Hargeysa oo dad badan oo badhtamaha magalada dhisay ku jiraan, waxa ku soo faruurmay laba laagood oo ah ishii Cobosha oo qolada farsamadda ka wada hadalnay sidii wax looga qaban lahaa, iyo laagta kale ee dusha ka timaada sidii xabaalaha looga duwilahaa. Hoyga rasmiga ahi waa intaa yar ee qofku ka leeyahay dhulka, dhibaato weyna way ka dhacday halkan, waxaanu lahayn dawlad hoose ahaan dhaqaalahayagu wuu yar yahay laakiin macnihii lagu dhisi lahaa ama lagu badbaadin lahaa ayaanu haynaa, macnihii iyo qalabkiiba waanu haynaa, maalinta Arbacadda ee soo socda dadka danaynayaa inay wax ka qabtaan waa inay halkan iskugu yimaadaan tobanka barqonimo arrintaasi oo laga wada hadli doono sidii wax looga qaban lahaa. dhaqaale badan ayey u baahantahay farsmadii sidii wax looga qabanayey waxa ay sameeyeen, iyadoo dhamaystiran lagu soo bandhigo maalinta Arbacadda ah ee la iskugu imanayo sidii xabaalahan loo badbadin lahaa.”
Dhinaca kale, waxay golaha deegaanka Hargeysa u mahadnaqeen Sheekh Aadan Siiro oo hore wax uga qabtay Laagaha ku faruurmay Xabaalaha, isaga oo kaabaddo ku wareejiyey qaybo ka mid ah xabaalaha si daadadku uga leexdaan, in kasta oo daadadku burburiyeen qaybo ka mid ah Kaabadaha.
CODKAHARGEYSA.COM
INFO@CODKAHARGEYSA.COM