Hargeysa (CodkaHargeysa)- Khilaaf, ayaa ka dhex-curtay hoggaanka ssare ee Xisbiga Mucaaridka ah ee WADDANI, kaasoo laba Garab oo mid ka mid ah uu Guddoomiye Cirro hoggaamiyo u kala qaybiyey WADDANI, sida uu shaaca ka qaaday Guddoomiye Ku-xigeenka saddexaad ee Xisbigaas Cabdi Raygal Beegsi.
Guddoomiye Ku-xigeenka Saddexaad ee Xisbiga Mucaaridka ah ee WADDANI Cabdi Raygal Beegsi, ayaa sheegay in khilaaf ka dhex-jiro Xisbigooda oo ay jiraan Masuuliyiin sare oo Jabadaan ku dhex-ciyaaraya Xisbiga. “Waxoogaa waxaa jira niman Masuulkii lagaga tegay Xisbiga ayaa Jabadaantii ciyaalka ku dhex-ciyaaraya Xisbiga, khilaaf badani kama dhex-jiro. Koox gaar ah ayaa tallaabadii la qaado mooyee tallaabo kale ka dhex-qaadaysa oo Masuuliyiinta Xisbiga ka tirsan, weliba Musharrixiinta waawayn ah.” Sidaa ayuu yidhi Cabdi Raygal Beegsi.
Waxa uu Guddoomiye Ku-xigeenka Saddexaad ee Xisbiga WADDANI Cabdi Raygal oo shalay u warramay Royal TV, intaas ku daray oo uu yidhi; “Wixii loo igmaday inay ka shaqeeyaan oo ay ka baxaan waxaan loo igman baan ku talin lahaa. Anigu waxaan ahay labada garab Garabka leh toos halloo socdo, Garabkaas Guddoomiyaha guud baa hoggaamiya, waa garab kale oo aan sidaa u sii fidsanayn oo Xisbiga dhexdiisa ka bilaabmay.”
Haddaba, si aannu dhiniciisa war uga helno Guddoomiye Ku-xigeenka koowaad ee Xisbiga WADDANI Axmed Muumin Seed ahna Ku-simaha Guddoomiyaha, ayaa Wargeyska Himilo khadka taleefakna kula xidhiidhay Guddoomiye Seed, hase-yeeshee, waxa uu wakhtigaas oo fiid ahayd Wargeyska u ballan-qaaday inuu Warka siinayo, balse uu markaas shirk u jiro, isagoo marar dambe oo taleefanka lagu celiyeyna sheegay inuu shirii weli ku sii jiro, waxa uu markii dambe abbaaro 11:06-qiiqo ee xalay xidhay Taleefankiisa gacanta, waxaanay taasi keentay inay suuragal noqon weydo in dhinaca eedaynta Cabdi Raygal ku socotaa wax jawaab ah ka bixin waayo warka ku lidka ah.
Afhayeenka Xisbiga WADDANI Xildhibaan Ibraahin Mahdi Buubba oo aannu isagana isku daynay inaannu warkaas wax ka weydiinno, ayaanay noo suuragelin inaannu war ka helno, ka dib markii uu naga qaban waayay Taleefankiisa gacanta oo aannu dhawr jeer oo xalay ah ka wacnay.
DAAWO
CodkaHargeysa.com/Hargeysa